काठमाडौं, ३ चैत । बौद्धिक व्यक्तित्व प्रा।माणिकलाल श्रेष्ठको मंगलबार निधन भएको छ ।निमोनिया तथा अन्य विभिन्न संक्रमणले ग्रसित भएपछि श्रेष्ठलाई लामो समयसम्म अस्पतालमा भर्ना गरी उपचार गरिएको थियो । केही सुधार भएपछि उनलाई घरमै राखी उपचार गरिँदै आइएको थियो ।

त्यसबाहेक, उनलाई नियमितरुपमा डायलाइसिससमेत गरिँदै आइएको थियो । पुराना पुस्ताका तथा अहिलेका चर्चित वामपन्थी नेताहरुले समेत श्रेष्ठलाई आफ्ना गुरु मान्ने गर्छन् ।

पुराना पुस्ताका नेताहरु समेत सैद्धान्तिक विषयका लागि श्रेष्ठसँग बहस छलफल गर्ने तथा उनीसँग सरसल्लाह लिने गर्थे।

लामो समय प्राध्यापन पेसामा रहेका श्रेष्ठ संवैधानिक कानुनमा स्नातक गर्ने नेपालको पहिलो व्यक्ति हुन भने नेपाल मार्क्सवादीका प्रथम प्रवक्तासमेत थिए । श्रेष्ठको जन्म विसं १९८९ मा भएको थियो ।

पछि त्रिवि नेपालभाषा केन्द्रीय विभागमा पाश्चात्य समालोचना विषयमा प्राध्यापन गरेका थिए । ‘उहाँ (माणिकलाल श्रेष्ठ) बहुआयामिक व्यक्तित्व हुनुहुन्थ्यो,’ अधिकारवादी नेता मल्ल के सुन्दर भन्छन्, ‘वामपन्थी विचारक, इतिहासका सूक्ष्म ज्ञाता, विज्ञानका ज्ञाता, कानुनका ज्ञाता, नेपालभाषाका समालोचक, मातृभाषा अभियन्ता, विश्वविद्यालयका प्राध्यापक भनेर चिनिनु हुन्थ्यो ।’

उनको नेपालभाषामा ‘पाश्चात्य समालोचना सिद्धान्त’ पुस्तक प्रकाशित छ । त्यसैगरी श्रेष्ठका सयौं विचारात्मक आलेखहरू विभिन्न पत्रपत्रिकामा प्रकाशित छन् । माणिकलाल पत्नी सुशाीला सिंह‘शिलु’ (सर्वोच्च अदालतको पहिलो महिला न्यायाधीश)को गत जेठ ९ गते निधन भएको थियो । माणिकलालका दुई छोरा वरिष्ठ कार्डिओलोजिस्ट डा. मलखलाल श्रेष्ठ र चिकित्सक डा. सितुलाल श्रेष्ठ छन् । जेठो छोरा विदेशमा रहेकाले उनी फर्किएपछि श्रेष्ठको अन्त्येष्टि गरिने परिवारले जनाएका छन् ।