काठमाडौं, २ चैत्र । नेकपा एमालेका अध्यक्ष एवं प्रधानमन्त्री केपी शर्मा ओलीले नेकपा माओवादी केन्द्रका अध्यक्ष पुष्पकमल दाहाल प्रचण्डलाई भेटको प्रस्ताव गर्नुभएको हो । सोमबार बिहान ओलीले प्रचण्डलाई फोन गरेर भेटको प्रस्ताव गरेको माओवादी केन्द्रका एक नेताले बताउनुभयो ।

‘उहाँले भेटौ कुरा गरौं भनेर प्रस्ताव गर्नुभएको छ । प्रचण्ड कमरेडले भेट्न त के भयो र भेटौंला तर अहिले म बैठकमा छु भन्नु भएछ,’ प्रचण्डनिकट ती नेताले भने, ‘त्यसपछि उहाँ (ओली) ले बिहान बेलुका समय मिलाएर भेटौँ न भन्नु भएछ ।

त्यसपछि प्रचण्ड कमरेडले पार्टी अलग अलग भएपछि अब के कुरा छ र भन्‍नुभयो ।’ ओलीले भने प्रचण्डसँग आफूले केही कुरा गर्न चाहेको बताउनुभयो । ‘तपाईंको कुरा तपाईसँग हुन्छ, मेरो कुरा मैसँग हुन्छ । मैले भनेको कुरा तपाईंले मान्नु पर्छ भन्ने पनि छैन, तपाईंले भनेका कुरा मैले मान्नु पर्छ भन्ने पनि छैन । तर म केही कुरा गर्न चाहन्छु,’ ओलीले प्रचण्डसँग भन्नुभएको थियो । गत पुस १५ गते ओलीले दाहालपत्नी सीताको स्वास्थ्य अवस्था बुझ्न प्रचण्डलाई फोन गर्नुभएको थियो । त्यसयता सामान्य संवाद पनि भएको छैन ।