काठमाडौं, २ चैत । नेकपा एमालेका अध्यक्ष एवम् प्रधानमन्त्री केपी शर्मा ओली र वरिष्ठ नेता माधवकुमार नेपालबीचको छलफल निष्कर्षविहीन भएको छ।पार्टी कार्यालय धुम्बाराहीमा भएको छलफलमा ओलीसहित उहाँको तर्फबाट ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ सहभागी हुनुहुन्थ्यो ।

अर्कातर्फ नेपालसहित भीम रावल, सुरेन्द्र पाण्डे, घनश्याम भूसाल, गोकर्ण बिष्ट र रघुजी पन्त सहभागी रहनु भएको थियो । ओलीले बालुवाटार बोलाए पनि नेपाल त्यहाँ जान तयार नभएपछि पार्टी कार्यालयमा यो छलफल भएको हो ।बैठकमा अध्यक्ष ओलीले फागुन २८ गते आफू पक्षकाबाहेक सबैको जिम्मेवारी खोस्ने र माओवादी केन्द्रका नेताहरुलाई जिम्मेवारी दिन गरेको निर्णय फिर्ता लिन अस्वीकार गर्नुभएको बताइएको छ। ओली आफ्नो अडानमा कायमै रहेपछि छलफलमा कुनै सहमति हुन नसकेको हो । शीर्ष तहमा छलफललाई निरन्तरता दिने सहमति भने भएको नेपाल पक्षका नेता रघुजी पन्तले जानकारी दिनुभयो ।

उहाँले भन्नुभयो , ‘सौहार्दपुर्ण रुपमा वार्ता भयो । वार्ता सकारात्मक भयो । कुराकानी जारी रहन्छ । कुराकानी जारी राख्ने तर अहिलेको अवस्थामा आ–आफ्ना अडान कायमै छन् ।’
बैठकपछि प्रतिक्रिया दिँदै नेता पन्तले एमालेलाई बलियो बनाउन अध्यक्ष तथा प्रधानमन्त्री केपी शर्मा ओलीले सकारात्मक भूमिका खेल्ने अपेक्षा राखेको भन्दै आफ्नो अडान कायमै रहेको बैठकमा भनेको बताउनुभयो । ‘बैठकमा हामीले फागुन २८ गते भएको बैठकको निर्णय थाहा पनि छैन, त्यो बैठकको निर्णय स्वीकार पनि नगर्ने भनेर भन्यौं,’ उहाँले भन्नुभयो ।चार महिनापछि भएको ओली र नेपालको बैठकमा ओली पक्षबाट प्रधानमन्त्री ओलीसहित महासचिव ईश्वर पोखरेल, उपमहासचिव विष्णु पौडेल र सचिव प्रदिप ज्ञवाली, सुवास नेम्बाङ लगायतको सहभागिता थियो भने माधव नेपाल पक्षका नेताहरू माधव कुमार नेपाल, झलनाथ खनाल, भीम रावल, गोकर्ण विष्ट र घनश्याम भुसाल सहभागी रहनुभएको थियो ।