काठमाडौं, २९ फागुन । प्रधानमन्त्री तथा एमाले अध्यक्ष केपी शर्मा ओलीले दलको बैठक नबसी अध्यक्षलाई निष्कासित गरेको र संसदीय दलको बैठक नबसी दलको नेता परिवर्तन गर्ने काम भएको बताउनु भएको छ । प्रतिनिधिसभा विघटनको असंवैधानिक कदमपछि तत्कालीन नेकपामा उत्पन्न भएको विवादतर्फ संकेत गर्दै उनले कम्युनिस्ट आन्दोलन बर्बाद गर्नका लागि त्यस्ता कदम चालिएको बताउनुभयो । एमालेको भातृ संगठन अखिल नेपाल महिला संघको राष्ट्रिय भेलालाई भृकुटीमण्डपमा शनिबार सम्बोधन गर्दै एमाले अध्यक्ष ओलीले पार्टीमा विधि र पद्धतिको कुरा गर्नेहरूले त्यो पालना नगरेको बताउनुभयो । विधि र पद्धतिका कुरा गर्ने तर बाहिर बाहिर हस्ताक्षर गरेर, विधि र पद्धति भन्या के हो ? पार्टीको बैठक बस्या छैन अध्यक्ष निकाल्या रे । दलको नेता फेर्‍या रे, बैठक बस्या छैन, ओलीले नेता नेपालतर्फ संकेत गर्दै भने, अर्को एक जना अध्यक्षका लागि हिरिक्क हिरिक्क हिरिक्क गरिराख्या थिए । अध्यक्ष भए अरे ।

प्रतिनिधिसभा विघटन गर्ने ओलीको असंवैधानिक कदम सर्वोच्च अदालतले खारेज गर्दै प्रतिनिधिसभा पुनःस्थापना गरेपछि तत्कालीन नेकपाका अध्यक्ष पुष्पकमल दाहाल र माधवकुमार नेपालले चितवनमा खुसीयाली मनाएका थिए । त्यसबारे ओलीले भने ुसानो कुरा पायो कि दंग, फुरुङ्ग, अबीर जात्रा, लड्डु । मैले भने केका लागि खुसी भएका हुन् यिनीहरू ? केका लागि अबिर जात्रा ? के पाए ? के पाउँछन् ? उनले त्यो कदम आन्दोलन बर्बाद पार्ने, आन्दोलनको नेतृत्व, पार्टी र देशलाई बर्बाद पार्ने भएको बताउनुभयो । ओलीले प्रतिनिधिसभा विघटन गरी चुनाव घोषणा गर्दा लोकतन्त्र मासिन्छ भनेको तर अबको डेढ-दुई वर्षमा चुनाव हुँदा लोकतन्त्रको आयु डेढ दुई वर्षमात्रै हो त ? भनेर प्रश्न गर्नुभएको थियो । उहाँले त्यस्तो कुरा गर्नेहरू नक्कली लोकतन्त्रवादी भन्नुभयो । केही नेताहरू केपी ओलीलाई हटाउनुपर्‍यो, विकासको लहर ल्यायो । विकास नगर्ने प्रधानमन्त्री ल्याउनुपर्‍यो भन्दै विभिन्न ठाउँमा निवेदन हाल्न गइरहेको ओलीको आरोप थियो ।

हामीबाहेक अर्को देशलाई सही ढंगले नेतृत्व दिने न पार्टी छ न कुनै नेता छ । सोच नै छैन त्यस्तो । कुनै नेताको वक्तव्यमा, भाषणमा विकास छ ? उहाँले भन्नुभयो । कोही महिला अगाडि बढेमा त्यसलाई अनावश्यक टीकाटिप्पणी हुने गरेको ओलीको भनाइ थियो । एउटा महिला अगाडि बढ्यो भने के भन्दा रहेछ्न् ? के सोच्दा रहेछन् ? भन्ने उनीहरुको भाषणमा देख्नुभएको होला । पुरुष सांसद भयो भने बाहुबलबाट भएको र क्षमताले भएको हुने, महिला सांसद भयो भने कसरी हुर्मत लिने रहेछन् भन्ने देख्नुभएको होला, उहाँले भन्नुभयो ।

त्यस्तो सोचको अन्त्य गर्नका लागि सोचमा परिवर्तन गर्नुपर्ने ओलीको भनाइ थियो । उहँले भन्नुभयो मानसिक चिन्तनमा अप्रेसन गर्नुपर्छ, टाउकाको अप्रेसनले हुन्न । पार्टीमा आउने समस्याको सामना गर्ने ओलीको भनाइ थियो । उहाले कुनै चिन्ता नलिन कार्यकर्ताहरूलाई सुझाव दिनुभयो अहिले कसैले आफूलाई हटाए आफू अबको चुनावमा बहुमत लिएर सत्तामा पुग्ने दाबी समेत गर्नुभयो । अहिले हटाउन सक्छ कसैले भने हटाएर देखाओस् । जालझेल गरोस् । मोर्चा कसोस् । मोर्चा कसेर हटाउन सक्छ भने हटाओस् । २० महिनापछि यो पार्टी, सूर्य चिह्नधारी पार्टी दुई तिहाई बहुमतका साथ सिंहदरबारको मूल गेटबाट भित्र छिर्छ । हामीलाई प्रतिपक्षमा रहन कुनै गाह्रो छैन । हामी राजनीतिक प्राणी हौं, उहाँले भन्नुभयो ।