चर्चित हाँस्यकलाकार मनोज गजुरेलको करिब ३ बर्षअघि पूर्वपत्नी मिना ढकालसँग डिभोर्स भैसकेको थियो । तर मिनाले बारम्बार अन्तवार्ताहरुमा मनोजलाई विभिन्न आरोप प्रत्यारोप लगाउँदै आएकी छिन् । उनले मनोजलाई गाली बेइज्जती गर्ने क्रम रोकेकी नै छैनन् । अझ मनोजले केहीसमय अघि आफूले दोस्रो विवाह गर्ने तयारी गरिरहेको बताएपछि मिनालाई आगो बलेको छ । त्यसपछि उनले अन्तवार्ताहरुमा मनोजका बारेमा अफवाह फैलाइरहेकी छिन् ।

यसबारे मनोजले बल्ल आफ्नो प्रतिक्रिया दिएका छन् । मनोजले आफूले अहिलेसम्म सहेर बसेको तर अब भने मिनाले आफ्नो सारा हद पार गरेकाले अब कानूनी प्रक्रियामा जाने सोच रहेको बताएका छन् । पूर्वश्रीमतीका क्रियाकलापले आफ्नो चरित्रहत्या भएको र आफ्ना दुई छोराछोरीहरूलाई समेत असर पुर्‍याएको उनको गुनासो छ ।

सामाजिक सञ्जालमा स्टाटस लेख्दै उनले आफ्नो गुनासोहरु पोखेका छन् ।

गजुरेलले लेखेका छन्, ‘अब मैले अदालतमा बुझाउन आवश्यक नठानेको मेरो डिभोर्सको कारण र प्रमाणलाई सार्वजनिक गर्न बाध्य हुँदै गएको ठान्दैछु । सहनुको सीमा कटेपछि कानुनी उपचारको बाटो अपनाउनुको विकल्प नरहेको टुंगोमा पुगेको छु ।’

छोरीको भागमा परेको अंश फिर्ता गर्नेबाहेक आफूहरूबीच कुनै लेनदेन बाँकी नरहेको मनोजको भनाइ छ । डिभोर्सपछि आमासँग छोरी र बाबुसँग छोरा बस्ने सहमति भएको थियो । तर मनोजको भनाई अनुसार डिभोर्सको भएको ८ महिनामै आमासँग बस्न नसकेर छोरी बाबुसँगै बस्न आएकी छिन् । डिभोर्स गर्दा मनोजले मिनालाई एक करोड ३० लाख रुपैयाँ दिएका थिए, जसमध्ये ६५ लाख छोरीको लागि थियो ।