काठमाडौं, १९ कात्तिक । प्रधानमन्त्री केपी शर्मा ओलीले पूर्वसभामुख तथा प्रतिनिधिसभाका सदस्य कृष्णबहादुर महराकी श्रीमती सीता महराको निधनप्रति दु:ख व्यक्त गर्नुभएको छ ।

उनले सामाजिक सञ्जालमार्फत सीता महराको नर्भिक अस्पतालमा भएको निधनबाट अत्यन्त दु:ख लागेको बताउनु भएको हो । प्रधानमन्त्री ओलीले सीता महराप्रति भावपूर्ण श्रद्धाञ्जलि अर्पण गर्दै पूर्वसभामुख महरासहित शोकाकुल परिवारजनमा गहिरो समवेदना व्यक्त गर्नुभएको छ । उहाले भन्नु भएको छ–प्रतिनिधिसभाका सदस्य एवं पूर्वसभामुख माननीय श्री कृष्णबहादुर महराकी श्रीमती सीता महराको आज बिहान नर्भिक अस्पतालमा भएको निधनबाट अत्यन्त दु:ख लागेको छ। म दिवंगत सीता महराप्रति भावपूर्ण श्रद्धाञ्जलि अर्पण गर्दै पूर्वसभामुख महराजी सहित शोकाकुल परिवारजनमा गहिरो समवेदना व्यक्त गर्दछु।

पूर्वसभामुख कृष्णबहादुर महराकी श्रीमती सीताको आज बिहान कोरोना संक्रमणका कारण नर्भिक अस्पतालमा उपचारको क्रममा निधन भएको हो । स्वास्थ्यमा समस्या देखिएपछि उनलाई कार्तिक १३ गते दाङको गोर्खा अस्पतालमा भर्ना गरिएको थियो ।

उनलाई निमोनिया र श्वासप्रश्वासमा समस्या भएपछि कार्तिक १४ गते नर्भिक अस्पताल काठमाडौं ल्याइएको थियो । नर्भिक अस्पतालमा उपचारको क्रममा कोरोना परिक्षण गर्दा उनको रिपोर्ट पोजेटिभ आएको थियो । विगत १० वर्षदेखि माइस्थेनिया नामक रोगबाट पनि पीडित रहेकी थिइन्।