काठमाडौं २ जेठ — नेपाल सरकारले छिटै कालापानी, लिपुलेक तथा लिम्पियाधुरासहितको नेपालको नक्सा जारी गर्ने भएको छ । सरकारको नीति तथा कार्यक्रम प्रस्तुत गर्दै राष्ट्रपति विद्या देवी भण्डारीले आज यो घोषणा गर्नुभएको हो । यसैबीच शुक्रबार विहान बसेको नेकपाको सचिवालय बैठकले लिम्पियाधुरा, लिपुलेक र कालापानीसहितको नक्सा जारी गर्ने कुरा नीति कार्यक्रममा समावेश गर्न सुझाव दिएको थियो ।

पहिला नक्सा जारी गर्ने त्यसपछि वार्ता र कुराकानी हुंदै गर्छ भन्ने निष्कर्षमा प्रधानमन्त्रीसहितका नेकपा नेताहरु पुगेका थिए । यस अघि सरकारले ल्याउने नीति कार्यक्रममा सत्तारुढ दलभित्र छलफल नभएको भन्दै विरोध भएपछि शुक्रबार विहान नेकपा सचिवालयको बैठक बसेको थियो । त्यसैगरी तत्काल भारतले अतिक्रमित गरेको भूमि समेटिएको नक्सा सार्वजनिक गर्न बुधबार भएको सर्वदलीय बैठकले समेत सरकारलाई सुझाव दिएको थियो ।