काठमाडौं, १ जेठ । नेपाल–भारत सीमा क्षेत्र दार्चुला जिल्लाको व्यास गाउँपालिका–१ छाङ्गरू स्थित महाकाली नदी किनारमा सशस्त्र प्रहरीको टोलीले गस्ती सुरू गरेको छ। इतिहास मै पहिलो पटक सरकारले जिल्ला सदरमुकाम खलङ्गास्थित सशस्त्र प्रहरी बल नेपाल नं ५० गुल्मबाट बुधबार यहाँको सीमा सुरक्षाका लागि सशस्त्रको टोली पठाएको हो। प्रधानमन्त्री केपी शर्मा ओली नेतृत्वको सरकारले विवादित क्षेत्रमा राज्यको उपस्थिति जनाएको छ ।  राज्यको उपस्थिति देखेर स्थानियबासी खुशी भएका छन् ।

सधै भारतिय सेनाको हेलिकोप्टरमा देखिएको स्थानमा आज आफै देशको सेनाको हेलिकप्टर आकाशमा देख्दा निकै खुशि लागेको एक स्थानिले बताए । अव सरकारले कुटनितीकपहलबाट नेपालको अतिक्रमित भुभाग ल्याउनु पर्ने स्थानियबासीको माग रहेको छ ।

आफ्नो बन्दोबस्ती र गाँस, बास, कपासको जोहो गर्ने काम पूर्ण नहुँदै सशस्त्रले सीमा गस्तीलाई उच्च प्राथमिकता दिएर गस्ती नियमित गरेको छ । केही टोली दार्चुलाबाट आउँदै गर्दा अघिल्लो दिन आइपुगेका टोली सुरक्षामा खटिएको थियो । टोलीले भारतसँग जोडिएको महत्वपूर्ण नाका सीतापुलबाट गस्ती थालेको हो। नेपाल र भारत आवागमनका लागि यहाँको सीमा क्षेत्रमा महाकाली नदीमाथि बनेको काठे कच्ची पुल छ। त्यही पुलबाट नेपालीहरू आवतजावत गर्ने गर्छन्।

अहिले लकडाउनका कारण यहाँबाट आवतजावत ठप्प छ। सीतापुलको नेपालतर्फको भूभागमा नियमित ड्यूटीमा टोली परिचालन हुने सीमा निगरानी चौकी (बीओपी) का प्रमुख सशस्त्र प्रहरी निरीक्षक लिलीबहादुर चन्दले जानकारी दिनुभयो । बिओपीले यहाँको छाङ्गरू, कौवा, तिङ्कर, बुदी, नितिकुण्डालगायतको क्षेत्रका सुरक्षा गर्नेछ।

गस्ती सुरू गर्नुअघि सीमा अवलोकनका क्रममा गृह मन्त्रीका सुरक्षा सल्लाहकार प्रा डा ईन्द्रजीत राई र सशस्त्र प्रहरी निरीक्षक चन्दसँग सीमा सुरक्षामा खटिएको भारतीय एसएसबीका भुपेन्द्रकुमारले भेट गर्नु भएको थियो ।

उक्त अवसरमा नेपालले आफ्नो सुरक्षाका लागि टोली ल्याएको जानकारी दिँदै डा राईले अन्य विषयहरु सरकारबीच नै छलफल हुने भएकाले आपसी समन्वयमा काम गर्नुपर्ने सुझाव दिनुभएको थियो ।