काठमाडौं, २५ चैत ।  सामाजिक दुरीका साथ नेपाल कम्युनिष्ट पार्टी (नेकपा) को सचिवालय बैठक बालुवाटारमा शुरू भएको छ । बैठकमा सम्माननीय प्रधानमन्त्री तथा पार्टी अध्यक्ष केपी शर्मा ओलीले सरकारका तर्फबाट कोभिड–१९ अथवा कोरोना भाइरसको विश्वव्यापी संक्रमण, रोकथाम र उपचारको क्रममा चालिएका कदम र उपलब्धिहरूको बारेमा बैठकलाई जानकारी गराउनु भएको छ ।

प्रधानमन्त्री निवास बालुवाटारमा शुरू भएको बैठक मुख्यत : कोरोनाभाइरसका कारण उत्पन्न परिस्थितिको बारेमा केन्द्रित रहने नेताहरूले बताएका छन् ।

कोरोना संकट समाधानका लागि भन्दै सचिवालय सदस्य एवं प्रवक्ता नारायणकाजी श्रेष्ठले सचिवालय बैठक बोलाउन माग गर्नुभएको थियो ।
कोरोनका कारण लकडाउन शुरू भएपछि सत्तारुढ नेकपा सचिवालय बैठक बस्न सकेको थिएन ।  प्रधानमन्त्री केपी शर्मा ओलीले मिर्गौला प्रत्यारोपण गरेर फर्केपछि एकपटक मात्र सचिवालय बैठक बसेको थियो । (कोभिड १९)ले निम्त्याएको संकट र विकसित पछिल्लो अवस्थाको बारेमा छलफल गर्न नेकपा सचिवाल बैठक शुरू भएको हो ।