बुटवल, २७ फागुन ।
सरकारले कोरोना भाइरसको प्रकोपबाट सावधानी अपनाउन ठूलो संख्यामा भेला भएर होली नखेल्न आह्वान गरेपनि नेपालगन्जमा भने सरकारको घोषणा खोक्रो साबित भएको छ । तराई होलीको अवसर पारेर नेपालगन्जका बिभिन्न चौकहरु बिहानै देखि होली मय बनेका थिए । ठूलो संख्यामा भेला भएका स्थानीयबासीहरु रङ्गमात्र खेलेनन् नजिकको नालीको हिलो, कुहिएको अण्डा तथा बिबिध प्रकारका रङ्ग प्रयोग गर्दै नेपालगन्ज दिनभरि रङ्गीन बन्यो ।
सरकारले ठूलो संख्यामा भेला नहुन भन्दै होली समेत परिवारका बिच मात्र मनाउन भनेपनि सरकारी निर्णय कार्यान्वयन गराउन बांके प्रशासन उदाशीन देखियो । दिनभरी जसो छाडा छोडीएका होलीमा सहभागिहरुले जव सांझ पख मदिरा मस्त हुंदै आपसमा झगडा गर्न थाले तव मात्र प्रहरीले सक्रियता देखाएको थियो । होली खेलिरहेका भिडबाट २ जना प्रहरी अधिकारीहरुमाथि नै हातपात गर्न थालेपनि बांके प्रहरीले सांझ सम्ममा ५८ जनालाई नियन्त्रणमा लिएको छ । प्रहरी कारवाहिमा मंगलबारमात्र १ सय ५१ मोटरसाईकल चालकबाट ८३ हजार जरिवाना असुल गरेको जिल्ला प्रहरी कार्यालय बांकेले जनाएको छ । मोटरसाईकलमा ३ जना सवार हुने, मदिरा सेवन गरि अभद्र ब्यवहार गर्ने, महिलाहरुमाथि जबर्जस्ती रङ्ग लगाउने जस्ता कार्यहरु भएपछि प्रहरीले उनीहरुलाई पक्राउ गरेको बांकेका प्रहरी प्रमुख प्रहरी उपरिक्षक बिरबहादुर वलीले जानकारी दिनुभयो ।
ईलाका प्रहरी कार्यालय धनौलीका प्रहरी निरिक्षक र वडा प्रहरी कार्यालय नेपालगंजका नायव प्रहरी निरिक्षक माथि हातपात गर्ने २ जनालाई मुद्दा चलाईने र अन्यलाई चेतावनी दिएर अभिभावकलाई बुझाईने प्रहरी उपरिक्षक वलीले बताउनु भयो । प्रहरीमाथि हातपात गर्ने २ जनाको नाम भने प्रहरीले सार्वजानीक गरेको छैन ।
प्रदेश सरकारले मेला महोत्सव गर्न प्रतिबन्ध लगाएपनि नेपालगन्जमा निर्वाद महोत्सव समेत संचालन भएको थियो ।

तस्बिर : बिभिन्न सामाजिक सञ्जालबाट