काठमाण्डौं, १५ काक्तिक । अमेरिकाको न्यूयोर्कमा एकजनाले फुटपाथ र साइकल लेनमा जानाजान ट्रक जोताउँदा आठजनाको ज्यान गएको छ ।

घटनामा कम्तीमा १२ जना घाइते भएको अधिकारीहरुले बताएका छन् । लोअर म्यानह्याटनमा ती व्यक्तिले फुटपाथ र साइकल लेनमा पिकअप ट्रक जोताएपछि एउटा स्कूल बससंग ठोक्काएको प्रहरीले जनाएको छ । त्यसपछि २९ वर्षीय ती आक्रमणकारीले दुईवटा बन्दुक राखिएको आफ्नो ट्रक छाडेका थिए । लगत्तै प्रहरीले उनलाई गोली हानी नियन्त्रणमा लिएको विवरणहरुमा जनाइएको छ ।

घटनालाई न्यूयोर्कका मेयर बिल डे ब्लाजिओले शहरको मुटुमा निर्दोष नागरिकलाई निशाना बनाउने उद्देश्यले गरिएको कायरतापूर्ण आतंककारी कार्यको संज्ञा दिएका छन् । राष्ट्रपति डोनल्ड ट्रम्पले ट्वीट गर्दै ’आतंकवादी आक्रमण’का पीडित र उनीहरुको परिवारप्रति समवेदना व्यक्त गरेका छन् । प्रहरीले ठूलो आतंकवादी षड्यन्त्रण अन्तर्गत आक्रमण गराइएको भन्ने दिशामा हालसम्म कुनै प्रमाण फेला नपरेको जनाएको छ । प्रहरीले ट्रक चालकलाई गोली हानेपछि सबैजना भाग्न थाले भने ट्रक चालक ढलिसकेको एकजना प्रत्यक्षदर्शीले बताए । अर्का प्रत्यक्षदर्शीले ९÷१० राउण्ड गोली चलेको आवाज आफूले सुनेको बताए ।