धनुषा २९ साउन । विगत एक महिना देखि धनुषाको हँसपुर नगरपालिकामा लागेको ताला खोलिएको छ । नगरपालिकाका प्रमुख तथा उपप्रमुख बिचको विवादका कारण लागेको ताला बुधबार खोलिएको हो । नगरपालिकाका प्रमुख रामज्ञान मण्डलले काम गर्ने वातावरण बघचौडामा नरहेका कारण बेल्हीचोकमा गत साउन ३ गते अस्थायी कार्यालय सारेका थिए ।

प्रमुख मण्डलले बघचौडास्थित कार्यालयमा रहेको कागजात तथा फाइलहरु लग्न खोजेपछि आफूले साउन ३ गते राति ११ बजे सो कागजातहरुको सुरक्षाका लागि ताला लगाएको उपप्रमुख रेणु झाले बताइन् । उनले नगरपालिकाका अधिकृत हरिशंकर यादव, प्रशासनिक अधिकारी तथा सञ्चारकर्मीहरुको रोहवरमा ताला खोलेकी हुन् । यता उच्च अदालत जनकपुरले बघचौडामैे तत्कालका लागि कार्यालय संचालनमा ल्याउन अन्तरिम आदेश दिएपछि आफूले ताला खोलेको उपप्रमुख झाले बताइन् ।

उच्च अदालत जनकपुरले मंगलबार भदौ ३ गते बहस नभएसम्मका लागि कार्यालयलाई यथास्थितिमै राख्न आदेश दिएको थियो । नगरपालिकाको कार्यालय खोलिएपछि सम्पूर्ण कामकाज समेत बघचौडाबाटै संचालनमा आएको छ । नगरपालिकाको हाजिरी रजिष्टरमा अधिकृत यादवले हस्ताक्षर गर्दै कामकाज संचालनमा ल्याएका हुन् । नगरपालिकाका अधिकृत हरिशंकर यादवले अदालतले आदेश दिएपछि आफूहरु आदेशको सम्मान गर्दै बघचौडास्थित कार्यालयमा उपस्थित कामकाज संचालनमा ल्याएको बताए ।

यसअघि प्रमुख रामज्ञान मण्डलले बेल्ही चोकस्थित कार्यालय संचालनमा ल्याएपछि कर्मचारीहरुले साबिकको कार्यालयमा उपस्थित नभई बेल्हीचोकमै उपस्थित हुँदै आएका थिए ।