काठमाडौं, १२ असार । असारे विकास सक्ने चटारो बढिरहेका बेला निर्माण व्यवसायीहरुले अलकत्रा अभाव भएको बताएका छन् । भारत र तेश्रो मुलुकबाट नेपाल आयात हुने अलकत्रा र मट्टीतेलको अभाब हुँदा काम गर्न समस्या भएको निर्माण व्यवसायीहरुको गुनासो छ । भारतबाट नेपाल आयात हुने अलकत्रको आयात दर ९९ प्रतिशत (गाडी संख्याको आधारमा) कम भएपछि रुपन्देही क्षेत्रमा सडक निर्माणको काम प्रभाबित भएको छ ।

अहिले प्रदेश ५ मा विकासको चरणमा रहेका सडक आयोजना निर्माण सम्पन्न गर्नका लागि झण्डै ५ सय ट्रक अलकत्रा आवश्यक पर्ने लुम्बिनी निर्माण ब्यबसायी संघ बुटवलका अध्यक्ष मोहनलाल जोशीले बताउनुभयो । ब्यवसायी संघले बुटवलमा पत्रकार सम्मेलन गर्दै निर्माणका लागि चाहिने कच्चा पदार्थ बिटुमिन,अलकत्रा र मट्टीतेल पाइनै छाडेको बताउनुभयो । ‘राज्यको निरिहपनका कारण हामीले दुःख पायौं, हामीले काम सकिदिनुपर्ने राज्यले नाक फुलाउने हामीलाई राज्यले सहजीकरण गर्नु पर्दैन ?’ लुम्बिनी निर्माण ब्यबसायी संघ बुटवलका पूर्वअध्यक्ष जबिन कक्षपतीले भन्नुभयो ।

‘निर्माणमा समय तोक्ने, आबश्यक कच्चा पर्दाथको अभाब छ, हामीले कहाबाट ल्याउने अलकत्रा, कसरी समयमै निर्माण सकिन्छ ?’ उहाले प्रश्न गर्नुभयो ।निर्माण व्यवसायी यदुनाथ पाण्डेले सरकारले सहजीकरण गरिदिएमा निर्माणाधीन अवस्थामा रहेका ७० प्रतिशत काम समयमै सकिने दाबी गर्नुभयो ।

लुम्बिनी निर्माण व्यबसायी संघ बुटवलका सचिब ज्ञानबहादुर पुनले आफूहरुको चाहना समयमै निर्माण सकेर रकम भुक्तानी लिने भएको बताउनुभयो । तर, राज्यले निर्माण सकेका आयोजनाको रकम भुक्तानी नदिएर विकास निर्माणमा असहयोग गरेको उहाले गुनासो गर्नुभयो ।