टोकियो, , २ असार ।  नेपाल सरकारका शिक्षा, विज्ञान तथा प्रविधी मन्त्री गिरीराजमणी पोखरेलले मुलुक समृद्धीको मुल आधार नै विज्ञान र प्रविधि भएकोले अबको शिक्षा प्राविधिक हुनुपर्नेमा जोडदिनुभएको छ ।

उहाँले बिज्ञान र प्रविधी बिनाको शिक्षा सिपयुक्त नभई प्रमाणपत्रमुखी मात्रै भएको उल्लेख गर्दै अबको शिक्षाको दिशा प्राविधिक शिक्षा भएको स्पष्ट पार्नुभयो । नेपाली राजदुतावासले आइतबार जापानको टोकियोमा आयोजना गरेको कार्यक्रमलाई सम्बोधन गर्दै मन्त्री पोखरेलले वर्तमान शिक्षा प्रणाली केवल डिग्री हाशिल गर्ने र प्रमाणपत्र बुझ्ने मात्र भएको भन्दै सिप र प्रविधी सहितको जनशक्ती उत्पादन गर्ने बाटोमा सरकार लागेको बताउनुभयो । उहाले वर्तमान शिक्षा प्रणालीमा ८० प्रतिशत साधारण शिक्षा र २० प्रतिशत मात्रै प्रार्विधिक शिक्षा प्रदान भईरहेको तथ्य प्रस्तुत गर्दै अबको शिक्षा निती प्राविधिक शिक्षाको स्तर उन्नती गरि दक्ष र सिपयुक्त जनशक्ती उत्पादन रहेको बताउनुभयो । मन्त्री पोखरेलले अहिलेको शिक्षा निती नै माध्यमिक शिक्षा देखिनै प्राविधिक शिक्षा मार्फत १२ कक्षा उत्तीर्ण गर्दा एक सिपयुक्त जनशक्ती उत्पादन गर्ने भएको र सोही अभ्यासमा लागेको बताउनुभयो ।

“शिक्षालाई श्रम, श्रमलाई सिप र सिपलाई उत्पादनसंग जोड्छौ ।” मन्त्री पोखरेलले थप्नुभयो । विकास र प्रविधीको प्रयोगबाटै छलाङ मारेको देश जापान भ्रमणमा रहनु भएका मन्त्री पोखरेलले देश विकासको मेरुदण्ड नै शिक्षा भएकोले देशभित्रै आवश्यक गुणस्तरीय जनशक्ती उत्पादनका लागी शिक्षा प्रणालीमै सुधार गर्न नयाँ ढंगले सोचिएको समेत स्पष्ट पार्नुभयो । उच्च शिक्षाको लक्ष्य परिवर्तन गर्दै विश्वविद्धालयलाई परिवर्तन गरिने, मदनभण्डारी विश्वविद्यालय खोलिने, आयुर्वेद शिक्षा, योगह शिक्षा, प्राकृतिक तथा जडिबुटी जस्ता नेपालका लागि आवश्यकीय नयाँ नयाँ विषयमा उच्य शिक्षा प्रदान गरिने सरकारको योजना रहेको पनि मन्त्री पोखरेलले जानकारी दिनुभयो । बैदेशिक अध्ययनका लागि शिक्षामन्त्रालयले दिईदै आएको नो अप्जेक्सन सटिफिकेटमा (NOC) कानुनी समस्या आएकोले वितरण प्रणालीमा रोक लगाईएको भन्दै मन्त्री पोखरेलले संसदमा छलफल चलिरहेकोले निकास खोजिने प्रष्ट पार्नुभयो ।

“आत्तिई हाल्नु पर्ने अवस्था छैन, धैर्य गर्नुस, निकास खोज्छौं ।” मन्त्रीले भन्नुभयो । यसै विषयमा बजारमा केही नक्कली कागजात समेत भेटिएका थिए । नेकपाका स्थायी समिति सदस्य समेत रहनु भएका मन्त्री पोखरेलले यस अघि नेकपाको प्रवास संगठन प्रवासी नेपाली एकता मंचको कार्यकर्ता भेटघाट कार्यक्रमलाई सम्वोधन गर्नुभएको थियो । कार्यकर्ताले प्रवासी संगठनको एकता प्रकियामा ढिलाई हुदा कार्यकर्तामा मनमुटाव सुरु हुन थालेको गुनासो गरेका थिए ।

कार्यकर्ताको गुनासोलाई सम्वोधन गर्दै मन्त्री पोखरेलले छिट्टै टुङगो लगाउने आश्वासन दिनुभएको थियो । कार्यक्रममा जापानका लागि नेपाली राजदुत प्रतिभा राणाले जापानमा १० हजार नेपाली हुदा ३ जना डिप्लोम्याटिक कर्मचारी रहेको र हाल ९० हजार नेपाली हुदा पनि सोही दरबन्दीने नै कार्यसम्पादन गर्नुपरेकोले असुविधा भएको भन्दै मन्त्री पोखरेल मार्फत नेपाल सरकारको ध्यान आकषर्ण गराउनुभएको थियो । उहाले राजदुताबासको आफनै भवन नहुदा भिआईपी आउदा समस्या भएको गुनासो समेत गर्नुभएको थियो ।

समारोहमा बोल्दै एनआरएन अध्यक्ष भवन भट्टले सरकारसंग सहकार्य गरि एनआरएनले शिक्षाको क्षेत्रमा थुप्रै कार्यक्रम ल्याएको बताउनुभयो । समारोहमा नेपाल विज्ञान तथा प्रविधि प्रतिष्ठानका उपकुलपति डा. सुनिलबाबु श्रेष्ठ, एनआरअनका उपाध्यक्ष कुमार पन्त लगायत जापानमा अवस्थित नेपाली संग संगठनका प्रतिनिधी, प्राज्ञिक वर्ग, पत्रकार, विद्यार्थी र एनआरएन अभियान्ताहरुको बाक्लो उपस्थिती रहेको थियो ।