नेपालगञ्ज, ८जेठ ।
जिल्ला मातपोत कार्यालय बांकेमा कार्यालय नै रित्तो हुने गरि कर्मचारी प्रहरी हिरारतमा पुगेपछि सेवाग्रहीको काममा गम्भीर असर परेको छ । कुल ५१ जना कर्मचारीको दरबन्दी रहेको कार्यालयमा १७ जना कर्मचारी मात्र हाजीर भएपछि १ दिनमा सकिने काम महिना दिन लाग्ने गरेको छ ।
सरकारी जग्गा किर्ते गरी व्यक्तिको नाममा पास गरेको आरोपमा मालपोतका कर्मचारीहरुलाई गत चैत्र पहिलो साता प्रहरीले नियन्त्रणमा लिएको थियो । जिल्ला प्रहरी कार्यालय बांकेले अनुसन्धानको लागी भन्दै एकैपटक झण्डै एक दर्जन विभिन्न पदमा कार्यरत कर्मचारीलाई पक्राउ गरेपछि नियमित कामकाजमा समस्या उत्पन्न भएको छ । सेवाग्राहीको घुंइचो लाग्ने मालपोतमा दुई महिना हुनलाग्दासमेत भुमि ब्यवस्था तथा अभिलेख बिभागले कर्मचारी नखटाईदिंदा जनताले दुःख पाउने गरेका छन् । जग्गा फुकुवा गराउन मालपोत कार्यालय पुगेका बांके खजुरा गाउँपालिकाका धनप्रसाद ढकालले निकै ढिलो हुनेगरी काम हुने गरेको बताए । एउटा कर्मचारी अभाव अनी भएका कर्मचारीहरुले पनी सिस्टममा काम नगर्दा सेवाग्राहीहरुले सास्ती पाइरहेको उनको भनाई रहेको छ ।
५ जना मालपोत अधिकृतको दरबन्दीमा कार्यालयमा २ जना कार्यरत थिए, तर ती २ जना पनि सरकारी जग्गा ब्यक्तिको नाममा दर्ता अभियोगमा निलम्बनमा परेपछि फरार छन् । त्यस्तै १३ जना नायव सुब्बामा ६ जना बहाल रहेकोमा १ जना निलम्बन र ४ जना हिरासतमा पुगेपछि १ जनाबाट काम भईरहेको छ । १५ जना खरिदारको दरबन्दी रहेको मालपोत बांकेमा ९ जना बहाल रहेकोमा ३ जना निलम्बन र १ जना हिरासतमा पुग्दा ५ जनाबाट सेवा दिने गरिएको छ । २ जना कम्प्युटर अपरेटरमा १ जना हिरासतमा पुगेपछि १ जना मात्र बहाल रहेका छन् ।

कर्मचारी अभाव देखाउंदै मालपोत कार्यालयमा महिना दिनसम्म पनि काम नहुने गरेको सेवाग्राहीहरु गुनासो गर्छन् । कर्मचारीले आज काम गर्न सकिंदैन भोलि फेरि आउनु होला भनेर फर्काउने गरेकोे गुनासो उनीहरुको छ । बैजनाथ गाउंपालिका ७ का वडा सदस्य गोपाल थारुले कर्मचारी अभावले सेवाग्राहीको काममा प्रभाव परेको बताए ।

भूमि व्यवस्था महाशाखासंग पटक पटक कर्मचारी माग गरे पनि अहिलेसम्म कर्मचारी परिपूर्ती हुन नसकेको कार्यालय प्रमुख प्रेमबहादुर दौल्याल गुनासो गर्छन् ।
अहिले भएका कर्मचारीबाट नै सेवाग्राहीलाई कार्यालयले सेवा दिईरहेको छ ।
जनताको काम छिटो छरिटो गर्ने र कुनै पनि बहानामा सेवा अवरुद्ध नहुने सरकारको प्रतिबद्धतालाई सरकार अन्तर्गतकै बिभागले अटेर गरेको उदाहरण हो मालपोत बांकेको समस्या । भुमि ब्यवस्था तथा अभिलेख बिभागले सरकारको लक्षमा असहयोग गरेको हो भने जनताको सेवा प्रभावित हुने गरि महिनौ कर्मचारी नपठाउने बिभागका अधिकारीहरुमाथि अनुसन्धान गर्न आवश्यक छ ।