काठमाडौँ, २४ वैशाख ।  उपत्यकाको शान्ति सुरक्षालाई थप मजबुत बनाउने क्रममा समुदाय–प्रहरी साझेदारी कार्यक्रम अन्तर्गत बुढानिलकण्ठ नगरपालिका, प्रहरी प्रभाग बुढानिलकण्ठ र प्रभु बैंकको सहयोगमा करिब २२ लाख ५० हजारको लागतमा ५० वटा सिसिटिभि क्यामेरा जडान गरिएको छ ।
बुढानिलकण्ठ एरिया भित्र पर्ने गोल्फुटार देखि बिष्णुमती सम्म सिसिटिभि क्यामेरा जडान गरिएको प्रहरीले जनाएको छ ।

महानगरीय प्रहरी कार्यालय रानीपोखरीका कार्यालय प्रमुख प्र.ना.म.नि. शैलेश थापा क्षेत्रीको
अध्यक्षता र बुढानिलकण्ठ नगरपालिकाका नगर प्रमुख उद्धब खरेलले रिबन काटेर सिसिटिभि मोनिटरको रिमोट अन गरि सिसिटिभीको उद्घाटन गनुभयो ।

उद्घाटन कार्यक्रममा नगर प्रमुखले यस समुदाय प्रहरी साझेदारी कार्यक्रम अन्तर्गत प्रहरी र नगरपालिका बीच सहमति भए अनुसार अन्य बिकासलाई भन्दा सुरक्षालाई प्राथमिकतामा राखि सिसि क्यामेराहरु जडान गरिएको र यस कार्यले समाजमा घट्ने विभिन्न खाले अपराधिक घटनाहरुमा कमी ल्याई घटनाहरुको अनुसन्धानमा सहजता ल्याउने बिश्वास गर्नुभयो ।

नगरप्रमुख खरेलले आगामी दिनमा थप सडकहरु कालो पत्रे गर्दै सडक बत्तीको ब्यबस्था गरि समृद्द र शान्त नगरको पहिचान , नागरिक सुरक्षाको लागि हाम्रो अभियान भन्ने नगरपालिकाको नारालाई साकार पार्ने प्रतिबद्धता ब्यक्त गर्नु भयो ।

कार्यक्रमका अध्यक्ष प्र.ना.म.नि. थापाले यस क्षेत्रमा जडित सिसि क्यामेराहरुले अपराध न्युनिकरणमा टेवा दिनका साथै निश्पक्ष न्याय सम्पादनमा सहयोग पुर्याउने धारणा राख्नुका साथै सहयोगी संस्थाहरुलाई आगामि दिनमा थप यस्ता प्रशंसनीय कार्यहरु गर्दै जानेमा बिश्वास ब्यक्त गर्नु भयो ।