काठमाडौं,१३ चैत । अर्थमन्त्री डाक्टर युवराज खतिवडाले लगानी सम्मेलनको तयारी पूरा भएको बताउनुभएको छ ।

अर्थ मन्त्रालयमा आज आयोजित पत्रकार सम्मेलनमा अर्थमन्त्री खतिवडाले चैत्र १५ र १६ गते हुने तेस्रो लगानी सम्मेलनको तयारी पूरा भएको जानकारी दिनुभयो । सार्वजनिक क्षेत्रका ५० र निजी क्षेत्रका २७ गरी ७७ वटा परियोजनाका विषयमा छलफल हुने बताउनुभयो । सम्मेलनमा ६ सयभन्दा बढी लगानीकर्ताहरुको सहभागीता हुने पनि जानकारी दिनुभयो ।

लगानी सम्मेलनलाई सरकारले उत्सवको रुपमा लिएको बताउँदै अर्थमन्त्री खतिवडाले यसअघि भएको लगानी सम्मेलनका उपलब्धीहरुलाई अगाडि बढाउन पनि सम्मेलनको आयोजना गरिएको जिकिर गर्नुभयो ।

यसअघि पूर्व तयारी भएका योजनाहरुको सम्झौता समेत हुने जानकारी दिनुभयो ।स्वदेशी लगानीकर्ता र विदेशी लगानीकर्ताबीच नेटवर्किङ गर्ने काम लगानी सम्मेलनबाट हुने भएकाले स्वदेशी अथवा विदेशी लगानीकर्तालाई ऋण लगायतका विषयमा परामर्श पनि हुने अर्थमन्त्री खतिवडाले जानकारी दिनुभयो । सम्मेलनमा कुटनीतिज्ञहरु पनि सहभागी हुने उहाले जानकारी दिनुभयो ।