काठमाडौं,४ चैत । सक्कली नोट जस्तै अर्को नोट बनाउने भन्दै ठगी गर्ने २ जनालाई प्रहरीले पक्राउ गरेको छ । सोमबार महानगरीय प्रहरी परिसर काठमाडौंले काठमाडौंको बागबजारबाट म्याग्दी घर भइ भक्तपुर बस्ने ५२ वर्षीय भीमबहादुर मल्ल र ओखलढुङ्गा घर भएका ४६ वर्षीय मानबहादुर सुवेदीलाई पक्राउ गरेको हो ।

उनीहरुको साथबाट नक्कली नोटका १२ ओटा ‘बिटा’ फेला परेको छ । उनीहरुले विभिन्न व्यक्तिलाई सक्कली नोटबाट उस्तै देखिने र कसैले पनि पत्ता नपाउने अर्को नोट बनाइदिने भन्दै विभिन्न व्यक्तिलाई ठगी गर्दै आएका थिए ।

महानगरीय प्रहरी परिसर काठमाडौंका प्रहरी नायव उपरीक्षक (डिएसपी) होविन्द्र बोगटीका अनुसार उनीहरुले विभिन्न कला देखाएर मानिसहरुलाई (हेग्नोटाइज) गरी ठगी गर्दै आएका थिए । विभिन्न मानिसहरुलाई सक्कली जस्तै नक्कली नोट बनाउने भनेर, हेग्नोटाइज गरी ठगी गर्दै आएको भन्ने सूचनाका आधारमा उनीहरुलाइ प्रहरीले पक्राउ गरेको हो ।

उनीहरुको साथबाट सक्कलीजस्तै नक्कली नोट बनाउने भनेर प्रयोग गर्ने गरिएको विभिन्न प्रकारको रसायन, नोटजस्तो आकारमा बनाउनका लागि कागज काट्न प्रयोग हुने मेसिन र अन्य औजारहरु फेला परेको प्रहरीले बताएको छ ।