चितवन ३० फागुन । चितवन प्रहरीले ‘एक टोल एक घण्टा’ अभियानलाई तिव्रता दिएको छ ।
अभियानको नेतृत्व इलाका प्रहरी कार्यालय टाँडीका प्रहरी नायव उपरीक्षक दयानिधि ज्ञवालीले गरेका छन् ।
अभियानकै क्रममा प्रहरीले एक लाख ७ हजार लिटर घरेलु मदिरा बरामद गरी नष्ट गरेको छ ।
प्रहरीले यहि फागुन २३ गते देखि २९ गते सम्म सञ्चालन गरेको अभियानका क्रममा पूर्वी चितवनको कालिका,रत्ननगर,खैरहनी र राप्ती नगरपालिका विभिन्न क्षेत्रहरुमा प्रहरीहरु परिचालन गरिएको थियो ।

अप्रेसनमा प्रहरी नायव उपरीक्षक ज्ञवाली,इलाका प्रहरी कार्यालय खैरहनीका प्रमुख प्रहरी निरीक्षक धनदेब साउद,इलाका प्रहरी कार्यालय भण्डाराका प्रमुख प्रहरी निरीक्षक बसन्त आचार्य, रत्ननगरका प्रहरी निरीक्षक उमेश अमात्य सहित दैनिक ६० जनाको प्रहरीहरु अप्रेसनमा खटिएका थिए ।
उक्त अभियानका क्रममा प्रहरीले बरामद गरेको अवैध घरेलु मदिरा स्थानियबासी र जनप्रतिनिधीको रोहवरमा नष्ट गरिएको थियो ।

प्रहरीले ठुलो परिमाणमा घरेलु मदिरा नष्ट गर्न सफल भएको दावी गरेको छ । अभियानकै क्रममा प्रहरीले विभिन्न स्थानबाट अबैध नदि जन्य पदार्थ ओसार पोसारमा संलग्न ११ वटा ट्रिपर र ट्याक्टरलाई कारबाही गरिएको छ ।

संकास्पद गतिविधिमा संलग्न रहेको आशंकामा प्रहरीले पूर्वी चितवनबाट १३ जनालाई नियन्त्रणमा लिएको र राप्ती नगरपालिका ३ झुरझुरेका किरण गुरुङलाई घरेलु हातहतियार सहित पक्राउ गरी कारवाही अगाडि बढाइएको प्रहरी नायव उपरीक्षक ज्ञवालीले बताए । प्रहरी अभियाकै क्रममा ३ सय वटा सवारी साधनका अगाडिको झल्लर र स्टीकर समेत हटाइएको छ । स्थानीयले प्रहरी यस अभियानलाई निरन्तरता दिनुपर्ने बताएका छन् ।

प्रहरीले जिल्लामा चलाएको थ्रि–एस अप्रेसन अन्तर्गत पूर्वी चितवन एक हप्ते अभियान सञ्चालन गरिएको जिल्ला प्रहरी कार्यालय चितवनका प्रमुख प्रहरी उपरीक्षक शुशीलसिंह राठौरले जानकारी दिए ।