बुटवल, २७ फागुन ।
रोजगारदाताहरु सक्षम नहुंदा सम्म सरकारले लागु गर्न खोजेको सामाजिक सुरक्षा योजना कार्यान्वयन हुन नसक्ने उद्योगीहरुले बताएकाछन् । उनीहरुले राज्यले रुग्न बनेको उद्योगको जिम्मामा कोष जम्मा गर्ने काम छाडेर श्रमिकहरुको जिम्मेवारीबाट राज्य उम्कन खोजेको आरोप समेत लगाएकाछन् ।
रुपन्देही उद्योग संघले आज बुटवलमा गरेको एक अन्तरक्रियामा बोल्ने वक्ताहरुले राज्यले स्पष्ट उद्योग निती नबनाउंदै सामाजिक सुरक्षा योजना लागु गर्न खोज्नु गलत भएको बताएका थिए ।
अन्तरक्रिया कार्यक्रममा बोल्दै संघिय सरकारका श्रम तथा रोजगार मन्त्री गोकर्ण बिष्टले सरकारले लागु गर्न खोजेको सामाजिक सुरक्षा योजनाले श्रमीक र रोजगारदातका बिच रहेको दुरी कम हुने दाबी गर्नुभयो ।
उहांले युवाहरु बिदेश पलायन हुने क्रमलाई पनि सरकारको योजनाले रोक्न खोजेको भन्दै सुरक्षा योजनाले रोजगारदाताहरुलाई जनशक्तिको समेत अभाव नहुने बताउनुभयो ।
कार्यक्रममा सहभागि उद्योगिहरुले भने सरकारले लागु गर्न खोजेको योगदानमा आधारित सामाजिक सुरक्षा योजनाले उद्योगिहरुको समस्या बढाउने भन्दै चिन्ता ब्यक्त गरेका थिए । रुपन्देहीका उद्योगी बिष्णु श्रेष्ठले रोजगारदाताको समस्या नबुझी योजना ल्याईकाले कार्यान्वयन हुन नसक्ने बताउनुभयो ।
रुपन्देही उद्योग संघका निवर्तमान अध्यक्ष दिनेशराज रेग्मीले सरकारी योजना राम्रो भएपनि उद्योगहरुले धान्न नसक्ने बताउनु भयो ।
सरकारले श्रमिकरुको अधिकार सुनिश्चितता गर्ने भन्दै यसै वर्ष देखि योगदानमा आधारीत सामाजिक सुरक्षा योजना सार्वजानीक गरेको थियो ।