काठमाडौं, २ पुस।  निर्मला पन्तको हत्या अनुसन्धानमा प्रहरीले लापरबाही गरेको भन्दै प्रहरीकै भूमिकामाथि छानबिन गर्न गठित समितिले प्रतिवेदन बुझाएको छ। एआइजी धिरु बस्न्यातको टोलीले सोमबार आइजिपी सवेन्द्र खनाललाई प्रतिवेदन बुझाएको हो।

निर्मला हत्याकाण्डको अनुसन्धानमा प्रहरी अधिकारीकै भूमिकामाथी शंका उठेपछि प्रहरी प्रधान कार्यालयले गत साउनमा एआईजी बस्नेतको नेतृत्वमा छानबिन समिति गठन गरेको थियो । आईजीपी खनालले बस्न्यात नेतृत्वको समितिलाई प्रहरीको भूमिकाबारे आन्तरिक अनुसन्धान तयार पारेर प्रतिवेदन तयार पार्न निर्देशन दिएका थिए । समितिले ५ सय ३२ पृष्ठ लामो प्रतिवेदन तयार पारेको छ ।

समिति स्रोतले भन्यो, ‘‘समितिले अनुसन्धानमा कुनै न कुनै रुपमा जोडिएका सबै प्रहरीमाथि अनुसन्धान गरेको थियो । लामो अनुसन्धानपछि प्रतिवेदन तयार पारिएको हो । प्रतिवेदनमा प्रहरीबाट कहाँ–कहाँ कमजोरी भए लगायतका विषय समेटिएका छन् ।’’

स्रोतका अनुसार बस्न्यात नेतृत्वको समितिले अनुसन्धानमा संलग्न ३६ जना प्रहरीमाथि कारवाहीको सिफारिस गरेको छ । यसअघि नै कञ्चनपुरका तत्कालीन एसपी दिल्लीराज विष्ट, वडा प्रहरी कार्यालय कञ्चनपुरका इन्स्पेक्टर जगदिश भट्ट बर्खास्तीमा परिसकेका छन् भने अन्य ६ जना प्रहरी निलम्बनमा छन् ।

साउन १० गते घरबाट साथीको जान्छु भनेर निस्किएकी बालिका पन्त पन्त भोलिपल्ट उखुबारीमा मृत भेटिएकी थिइन्। उनका हत्यारा अहिलेसम्म पत्ता लाग्न सकेको छैन।