काठमाडौ‌, २३ मंसिर । कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको घटनामा संलग्न भएका आरोपित निर्दोष हुने संकेत देखिएको छ ।

हत्या आरोपमा संलग्न रहेको आरोपमा पक्राउ परेका प्रदिप रावल, बिशाल चौधरी र दिनेश चौधरी निर्मलाको बलात्कार पछि हत्याका दिन फरक समयमा प्रहरी नियन्त्रणमै रहेको खुलासा भएको हो ।

साउन ९ गते राति कञ्चनपुरको भीमदत्तनगर–१८ भगतपुरमा पाले चौधरीले सञ्चालन गरेको मासु पसलबाट कुखुरा चोरी हुन्छ । पाले चौधरी बिहानै अस्थायी प्रहरी चौकी सालघारीमा उजुरी लिएर पुग्छन् । पालेकै शंकाको आधारमा प्रहरीले स्थानीय प्रदीप रावललाई साढे १० बजेको समयमा पक्राउ गर्छ । प्रदीपले आफूले कुखुरा नचोरेको र विशालले चोरेको हुनसक्ने बताएपछि प्रहरीले प्रदीपलाई साढे १० बजेदेखि ११ बजेको समयमा छाडिदिन्छ । १० गते साँझ ६ बजे आसपासको समयमा कुखुरा चोरेको आरोपमा स्थानीय विशाल चौधरी पक्राउ पर्छन् ।

साँझ पक्राउ परेका विशाललाई वडा प्रहरी कार्यालयको हिरासतमा राखिएको थियो । साउन ११ गते बिहान ११ बजेसम्म पनि पाले चौधरीले प्रहरीमा सम्पर्क नगरेपछि विशाललाई प्रहरीले छाडेको थियो । साउन १० गते प्रदीप र विशाललाई प्रहरीले पक्राउ गरेको थियो । तर बिहान ११ बजेअघि नै साउन १० गते प्रदीप छाडिएका थिए भने साँझ ६ बजे पक्राउ परेका विशाल ११ गते बिहान छुटेका थिए । अनुसन्धानका क्रममा निर्मला पन्तको हत्या साउन १० गते दिउँसो २ देखि ३ बजेको समयमा भएको हुनसक्ने खुलेको छ । जबकी निर्मलाको हत्या दिउँसै भए पनि शव व्यवस्थापन १० साउन राति परेको पानी थाकेपछि गरिएको लगभग पक्का देखिन्छ । प्रत्यक्षदर्शी र उपलब्ध भिडियो फुटेज अनुसार ११ साउन १० बजे शव पाइएको स्थान नजिक निर्मलाका किताब नभिजेको अवस्थामा पाइएका थिए । १० साउन रातभर त्यसक्षेत्रमा घनघोर बर्सात भएको थियो ।

निर्मला पन्त साउन १० गते बिहान ११ बजे घरबाट निस्किएकी उनी बेपत्ता भएकी थिइन् । त्यसको भोलिपल्ट बलात्कारपछि हत्या गरिएको अवस्थामा उखुबारीमा शव फेला परेको थियो ।

उनीहरूको बयानमा प्रहरी महानिरीक्षक सर्वेन्द्र खनाल आफैँ उपस्थित भएका थिए । आईजीपीको उपस्थितिमा भएको बयानमा प्रदिपले आफू हत्यामा संलग्न रहेको प्रारम्भिक बयान दिएको प्रहरी स्रोतले बतायो । प्रहरीले उनीहरुबारे सार्वजनिक गरेको छैन् ।