काठमाण्डौ, २२ मंसिर।  किवानिज क्लव अफ काठमाण्डौ हेरिटेजले तार्केश्वर नगरपालिकामा रहेको एक सामुदायिक विद्यालयका बाल बालिकाहरुलाई जाडोको कपडा बितरण गरेका छन्।

शुक्रबार एक कार्यक्रमको आयोजना गरि काठमाण्डौको मुटुमा रहेको तार्केश्वर नगरपालिका-८ डाँडा गाउँ स्थित महादेव स्थान आधारभूत विद्यालयमा अध्ययनरत ६० जना विद्यार्थीहरुलाई जाडोको कपडा ट्रयाक सुट तथा ऊनीको टोपी वितरण गरेको क्लवका सदस्य दिल प्रकाश महर्जनले बताए ।

बाल बालिका तथा विद्यालयको क्षेत्रमा विभिन्न संघ संस्थाहरूले काम गर्ने गरेको भएपनि विपन्न वर्गका बाल बालिका अध्ययनरत सो विद्यालय तर्फ़ राज्य तथा सरोकारवालाहरूको ध्यान जान नसकिरहेको अवस्थामा किवानिज क्लव अफ काठमाण्डौ हेरिटेजले उक्त विद्यालयका विद्यार्थीहरुलाई न्यानो कपडा वितरण गरेको क्लवका अध्यक्ष राज कुमार श्रेष्ठले जानकारी दिएका छन ।

उनका अनुसार काठमाण्डौमा जाडो बढेसँगै विद्यार्थीहरुको संख्या घट्दै गरेकोले विद्यार्थीहरुको नियमित उपस्थिति होस भन्ने उद्देश्यले क्लवका सम्पूर्ण सदस्यहरुले गरेको आर्थिक संकलनबाट जाडोको सामग्री किनेर वितरण गरेको बताए ।

त्यस्तै बाल बालिका राष्ट्रका कर्णधार भएकोले उनीहरुको उज्वल भविष्यले नै देश र राष्ट्रको भविष्य निर्धारण गर्ने भएकोले आफुहरुले बाल बालिका कै क्षेत्रमा काम गर्ने उद्देश्यले क्लवको स्थापना गरेको क्लवकी उपाध्यक्ष मौलिका देउजाले बताइन।