ललितपुर, ३ मसिर । प्रधानमन्त्री एवम् नेपाल कम्युनिष्ट पार्टी (नेकपा) का अध्यक्ष केपी शर्मा ओलीले देश र जनताको हितमा योगदान गर्न सबैलाई आह्वान गर्नुभएको छ ।

प्रधानमन्त्री ओलीले जनताको हितमा योगदान गर्न सके स्वर्गीय प्रकाश दाहालप्रति सच्चा श्रद्धाञ्जली हुने विश्वास पनि व्यक्त गर्नुभयो । स्वर्गीय प्रकाश दाहालको प्रथम स्मृति दिवसको अवसर पारेर खुमलटारस्थित पार्टी अध्यक्ष पुष्पकमल दाहाल प्रचण्ड निवासमा आज आयोजित स्मृति सभालाई सम्बोधन गर्दै उहाँले शोकलाई शक्तिमा बदलेर जीवनलाई गतिशील बनाई राख्न पनि दाहाल परिवारलाई आग्रह गर्नुभयो । कार्यक्रममा भावविह्वल अवस्थामा रहेका अर्का अध्यक्ष प्रचण्ड र उहाँका परिवारलाई प्रधानमन्त्री ओलीले मृत्यु फर्काउन वा सच्याउन नसकिने विषय भएको स्मरण गराउँदै संयमता उपनाउन पनि पटक–पटक आग्रह गर्नुभयो ।

प्रधानमन्त्री ओलीले स्वर्गीय प्रकाश दाहालको निधनबाट सिंगो पार्टी, देश र जनता अझै पीडामा रहेको बताउँदै त्यसलाई शक्तिमा बदलेर देश र जनताको सेवामा लागि रहने प्रतिवद्धता पनि व्यक्त गर्नुभयो । उहाँले प्रकाश दाहाललाई समझदार युवा नेताको रुपमा पनि चित्रण गर्नुभयो ।

अध्यक्ष ‘प्रचण्ड’ले छोरा प्रकाश दाहालको सम्झनामा स्मृति प्रतिष्ठान बनाई समाजोपयोगी काम गर्ने बताउनुभयो । प्रकाश दाहालको पहिलो स्मृतिसभामा बोल्दै अध्यक्ष प्रचण्डले प्रकाश र ज्ञानु स्मृति प्रतिष्ठान स्थापना गर्ने सोच रहेको बताउनुभयो । प्रचण्डकी जेठी छोरी ज्ञानुको क्यान्सरका कारण यसअघि नै मृत्यु भइसकेको हो। उनीहरुको रुची भएको विषय शिक्षा, स्वास्थ्य तथा अनुसन्धान लगायतमा प्रतिष्ठानले काम गर्ने प्रचण्डले जानकारी दिनुभयो ।

प्रकाशको सम्झनामा स्मारिका प्रकाशित भएको र त्यसमा प्रकाशबारे जानकारी दिन खोजिएको पनि प्रचण्डले बताउनुभयो । सबैको सहयोग र सद्भावले आफ्नो परिवार विघटन नभएको भन्दै आभार व्यक्त गर्नुभयो ।