सिन्धुली, १९ कात्तिक । महिला, बालबालिका तथा जेष्ठ नागरिकमन्त्री थममाया थापाले सिन्धुलीको गोलञ्जोर गाउँपालिका–४ स्थित बत्सला माध्यामिक विद्यालयको नवनिर्मित भवन उद्घाटन गर्नुभएको छ ।
टीडीएच जर्मनीको सहयोग र रिलिफ नेपाल सिन्धुलीको समन्वयमा निर्मित छ कोठे भवनको मन्त्री थापाले एक समारोहबीच उद्घाटन गर्दै विद्यालय व्यवस्थापन समितिलाई हस्तान्तरण गर्नुभयो ।
विद्यालय भवनको उद्घाटन गर्दै मन्त्री थापाले विद्यालय भवन बनेर बालबालिकाको पढ्न पाउने अधिकारको पूर्वाधार तयार भएको स्पष्ट गर्नुभयो । सो अवसरमा भवन निर्माणका लागि सहयोग गर्ने दातृ निकाय र सम्वन्धित सबैलाई उहाँले धन्यवाद पनि दिनुभयो ।
वृद्धवृद्धा भत्ता वृद्धि नभएको स्वीकार्दै मन्त्री थापाले यसवर्ष ७० वर्ष उमेर पुगेका वृद्धवृद्धाका लागि एक लाख रुपैयाँ बराबरको बीमाको व्यवस्था गरेको बताउनुभयो । तर, आगामी वर्षबाट बृद्धबृद्धा भत्ता निरन्तर वृद्धि गरिँदै लगिने पनि उहाँले स्पष्ट गर्नुभयो ।
पार्टीले चुनावी दौरानमा गरेका प्रतिवद्धता क्रमशः पूरा हुँदै जाने भन्दै उहाँले ती प्रतिवद्धता कार्यान्वयनका लागि सरकारले अहिले ऐन कानुनहरु निर्माण गरिरहेको जानकारी दिनुभयो ।
कार्यक्रममा प्रतिनिधिसभाका सांसदद्वय गणेशकुमार पहाडी, गोमा देवकोटा, प्रदेश सभाका सांसद प्रदीप कटुवाल, जिल्ला समन्वय समितिका अध्यक्ष शंकर बर्मा, गोलञ्जोर गाउँपालिकाका अध्यक्ष पुष्पबहादुर कार्की, टीडीएच जर्मनीका कन्ट्री डाइरेक्टर श्यामकृष्ण श्रेष्ठ, नेकपा सिन्धुलीका नेता ज्वालाप्रसाद न्यौपाने लगायतले मन्तव्य राख्नुभएको थियो ।
कार्यक्रममा सिन्धुलीस्थित विभिन्न कार्यालयका प्रमुख तथा प्रतिनिधिहरु, स्थानीय नेता तथा समाजसेवीहरु, विद्यार्थी र अभिभावकको उपस्थिति थियो ।
कार्यक्रममा विद्यालय भवन निर्माणका सन्दर्भमा विभिन्न क्षेत्रबाट योगदान पु¥याउने व्यक्तित्वहरुलाई सम्मान गरिएको थियो । कार्यक्रम रिलिफ नेपालका अध्यक्ष दुर्गाराज पौडेलको अध्यक्षतामा भएको थियो ।
प्रतिक्रिया दिनुहोस्