काठमाडौं, ७ कात्तिक ।  कञ्चनपुरका तत्कालीन प्रमुख निलम्बित प्रहरी उपरीक्षक (एसपी) डिल्लीराज विष्टले प्रहरी प्रधान कार्यालयमा स्पष्टीकरण बुझाएका छन् ।
कञ्चनपुर की १३ वर्षिया बालिका निर्मला पन्तको बलात्कार तथा हत्या प्रकरणमा प्रमाण नस्ट गर्ने कार्यमा संलग्न रहेको आरोप लाग्दै आएका (एसपी) विष्टले २४ घण्टामा स्पष्टीकरण बुझाउनुपर्ने व्यवस्थाअनुसार बुधवार मध्याह्न प्रहरी प्रधान कार्यालयमा स्पष्टीकरण बुझाएका हुन् ।

गृहसचिव प्रेमकुमार राईको निर्देशनानुसार प्रहरी प्रधान कार्यालयलाई निलम्बित एसपी विष्ट र प्रहरी निरीक्षक जगदीश भट्टलाई स्पष्टीकरण सोध्न निर्देशन दिएको थियो ।  प्रहरी प्रधान कार्यालयका अनुसार एसपी विष्टले मंगलवार स्पष्टीकरण सोधिएको पत्र बुझेका थिए ।

‘गृह मन्त्रालयबाट प्राप्त निर्देशनानुसार प्रहरी प्रधान कार्यालयले निलम्बित एसपी विष्टलाई सोधेको स्पष्टीकरण प्राप्त भएको र स्पष्टीकरण जस्ताको तस्तै गृह मन्त्रालयमा पठाइएको नेपाल प्रहरीका केन्द्रीय प्रवक्ता एसएसपी उत्तम सुवेदीले जानकारी दिए ।

निर्मला पन्तको बलात्कार तथा हत्या प्रकरणमा प्राप्त प्रमाण नष्ट गरेको अभियोगमा गृहमन्त्रालय र प्रहरी प्रधान कार्यालयले विष्टमाथि छानबिन थालेको थियो । प्रहरी प्रधान कार्यालयले विष्टले नियतवश प्रमाण नष्ट गरेको भन्दै प्रहरी नियमावली अनुसार वर्खास्तका लागि गृह मन्त्रालयमा पत्र पठाएको थियो । गृह मन्त्रालय स्रोतका अनुसार विष्ट र भट्टले बुझाएको स्पष्टीकरण अध्ययन गरेर मात्रै उनीहरूको विषयमा निर्णय लिइने छ ।