दाङ, २५ असोज । हरेक बर्ष दाङवाट दशैका लागी काठमाडौं पठाउदै आएको खसीबोका यसबर्ष नजाने भएका छन । खाद्य संस्थान केन्द्रिय कार्यालय काठमाडौंले चाडपर्बका लागि यस बर्ष दाङबाट पाँचसय खसीबोका मगाएको थियो ।

तर खाद्य संस्थान अञ्चल कार्यालय दाङले पाँचसय खसी–बोका उपलब्ध गराउन नसक्ने भएको छ । खसी–बोका ढुवानी गर्ने समस्याका कारण काठमाडौं पठाउन नसकिएको अञ्चल कार्यालय दाङका निमित्त प्रमुख कृष्ण चौधरीले बताउनुभयो । ‘

केन्द्रले दाङबाट पाँचसय खसी–बोका काठमाडौं पठाउने भनी परिपत्र गरेको थियो’ उहाँले भन्नुभयो ‘तर ढुवानीको व्यवस्था नहुँदा हामीले खसीबोका काठमाडौं पठाउन सकेनौं ।’

अञ्चल कार्यालयको आफ्नै गाडि नहुँदा बिगतमा निजि गाडिबाट खसी–बोका काठमाडौं पठाउने गरेको भएपनि यस बर्ष भने निजि गाडिले पनि ढुवानी गर्न नमानेको उहाँले बताउनुभयो । गाडिमा लैजादै गर्दा बाटोमै खसी–बोका मर्ने र त्यो घाटा सम्बन्धित गाडिवालाले व्यहोर्नु पर्ने भएकाले निजि गाडिले ढुवानी गर्न नमानेको उहाँले बताउनुभयो ।

‘गत बर्ष पनि हामीले निजिबाट ढुवानी गर्न पठाएका थियौ, त्यतिबेला ४÷५ वटा खसी–बोका बाटोमै मरेका थिए’ उहाँले भन्नुभयो‘ त्यसको घाटा स्वयं गाडिवालाले व्यहोर्नुपर्छ, त्यही भएर पनि रिस्क लिन मान्दैनन् ।’

ढुवानीको व्यवस्था नहुँदा यस बर्ष खसीबोका समेत खरिद नगरिएको उहाँले बताउनुभयो । ढुवानीको व्यवस्था केन्द्रले गरेको भए सहज हुने उहाँको भनाई थियो । अञ्चल कार्यालयको एउटा गाडि भएपनि त्यसले खाद्यान्न सामान मात्रै ढुवानी गर्ने गरेको उहाँको भनाई थियो ।

बर्षेनी केन्द्रले दाङबाट दशै, तिहार, छठपर्बको लागि खसी–बोका मगाउँदै आएको छ । यस वर्ष दाङबाट पाँचसय खसी–बोकाको माग गरेको थियो । गत बर्ष दाङबाट तीनसय ८५ खसी–बोका काठमाडौैं पठाएको थियो ।

दाङका खसी–बोकाले काठमाडौंको चाडपर्ब धान्ने गरेको थियो । नेपाल खाद्य संस्थान केन्द्रीय कार्यालयले यस बर्ष दाङ, मकवानपुरबाट खसी लैजाने तयारी गरेको छ । काठमाडौंमा ६० हजार भन्दा बढी खसी आवश्यक हुने बताइएको छ ।