बेनी, १४ असोज । नेपाली काँग्रेसका केन्द्रिय सदस्य अर्जुननरसिंह केसीले प्रेसमाथिको हस्तक्षेपले लोकतन्त्र नै खतरामा परेको बताउनुभएको छ । नेपाल प्रेस युनियन म्याग्दीको सातौँ साधारण सभा तथा पाँचौ अधिबेशनको आईतवार बेनीमा उद्घाटन गर्दै नेता केसीले सो कुरा बताउनुभएका हो ।

वर्तमान सरकारले सामाजिक सञ्जाल नियन्त्रणको नाममा प्रेसमाथि नै अंकुश लगाउने काम गरेको भन्दै काँग्रेसका पूर्व सह–महामन्त्री समेत रहेका नेता केसीले प्रेसलाई स्वतन्त्र बनाउन दबाब दिने बताउनुभयो ।

न्यायलय माथि हस्तक्षप र प्रेसमाथिको अंकुश लोकतान्त्रिक मुल्य मान्यता विरुद्ध रहेको उल्लेख गर्दै उहाँले पत्रकारलाई स्वतन्त्र रुपमा निष्पक्ष भएर कलम चलाउने वातावरण सिर्जना गर्न सरकार गम्भिर हुनुपर्ने बताउनुभयो ।

पत्रकारीतालाई भोजन मण्डली र भजन मण्डली बनाउन सरकारले प्रेसमाथि हस्तक्षप गरेको उहाँको आरोप छ । नेपालमा पत्रकारहरु पत्रकारको भुमिकामा मात्रै नभएर लोकतान्त्रिक आन्दोलनको पहरेदार समेत रहेको नेता केसीले बताउनुभयो ।

नेता केसीले आम सञ्चार माध्ययममा नेतालाई नभई नितीलाई र व्यक्तिलाई नभएर सहि विचारलाई प्राथमिकता दिन पत्रकारहरुलाई आग्रह समेत गर्नुभयो । फरक प्रसंगमा नेता केसीले वर्तमान सरकारले जनतामाथि पटक पटक मुल्य बृद्धि गरि अन्याय गरेको बताउँदै निर्वाचनमा जनतासामु गरेका प्रतिबद्धतालाई नभुल्न सुझाब दिनुभयो ।

प्रधानमन्त्री केपी शर्मा ओलीले लोकतान्त्रिक मुल्य मान्यता विपरित अभिव्यक्तिहरु दिने गरेको आरोप लगाउँदै उहाँले मुलुकलाई समृद्ध बनाउने उखान टुक्कालाई व्यवहारमा कार्यान्वनय गरेर देखाउन चुनौती दिनुभयो ।

स्थानीय, प्रदेश र संघिय सरकारले करको सिमा निर्धारण नगर्दा जनतामा करको भार थपिएको बताउँदलै उहाँले करको उपयोगलाई समेत हेक्का राख्न आग्रह गर्नुभयो । मुलुकमा बलात्कारका घटना बढीरहेको तर्फ सरकारको ध्यानकर्षण गराउँदै नेता केसीले जनताको शान्ति सुरक्षा फितलो बन्नु दुखदायी रहेकोमा जोड दिनुभयो ।

सो अबसरमा प्रेस युनियन म्याग्दीद्धारा स्थापित ‘‘प्रेस युनियन पत्रकारीता पुरस्कार–०७५’’ बाट पत्रकार हरिकृष्ण गौतमलाई नगद रु ५ हजार सहित सम्मान पत्र र दोसल्ला ओढाएर सम्मान गरिएको थियो ।