बुटवल, १३ असोज । गृहमन्त्री रामबहादुर थापा बादलले दलाल र तस्करहरुलाई सखाप पारेमा मात्रै देशमा समाजवादको सुरुवात हुने बताउनुभएको छ । नेपाल सरकार गृह मन्त्रालको आयोजानमा शनिबार बुटवलमा भएको लागु औषध निषेध, मदिरा नियन्त्रण र महिला हिंसा न्युनिकरण सम्बन्धी सचेतना तथा अन्तरक्रिया कार्यक्रमलाई सम्बोधन गर्दै गृह मन्त्री राम बहादुर थापा बादलले तस्करहरु, दलालहरु देश भ्रष्टीकरणमा लागेको भन्दै तिनीहरुको दिन सकिएको बताउनु भयो ।
उहाले अबको अभियान गृह प्रशासनका तिनै तहबाट नै त्यस्ता दलाल, पुँजीपती, तस्करहरुलाई निमिट्यान्न पार्ने योजना रहेको भन्दै यसमा सबैको साथको खाँचो रहेको बताउनुभयो । पटक पटक दलाल पुँजीपती, गुण्डाका मतियारहरुले जनता ठग्ने गरेको भन्दै गृहमन्त्री थापाले जसका कारण देशमा समाजवाद स्थापना गर्नमा बाँधा अडचन आउने गरेको भन्दै त्यस्ता तत्वहरु राजनितीकदल र कर्मचारीतन्त्रमा समेत जरा गाडेर बसेको खुलासा गर्नुभयो ।
जनता र राज्य मिलेर मात्रै देश विकास संभव भएको बताउदै गृह मन्त्री थापाले महिला हिंसा अन्त्यको लागि स्थानिय तहबाट नै कार्यको सुरुवात हुनुपर्ने र यसमा गृह मन्त्रालयको सक्दो साथ र सहयोग रहेको बताउनुभयो । ७ सय ५३ तहबाट नै महिला हिंसा न्युनिकरण, मदिरा सेवनमा नियन्त्रण र समाजका विकृतिहरुर्लाइ हटाउनको लागि पहलको थालनी हुनुपर्ने उहाको भनाई छ ।कार्यक्रममा बोल्दै प्रहरी महानिरीक्षक सर्वेन्द्र खनालले लागू औषधको प्रयोगले समाज भयावहको अवस्थामा पुगेको भन्दै यसको नियन्त्रण र सचेतना अबको पहिलो आवश्यकता भएको बताउनुभयो ।
उहाले भन्नुभयो,‘यसको नियन्त्रण र सचेतना नफैलाए देश र बालबालिकाको भविश्य अन्धकार हुनेछ ।’ उहांले मुलुकभर हाल १५ लाख ६ सय युवा÷युवती लागू औषध दुव्यसनीमा फसेको समेत जानकारी दिनुभयो । समाजमा अवधार बढाउने यस्ता विकृतिका विरूद्ध महाअभियान थाल्नुपर्नेमा महानिरिक्षक खनालको जोड थियो ।