काठमाडौं,१३ असोज । कार्यवाहक प्रधानमन्त्री ईश्वर पोखरेलले दलहरुले राजनीतिक नारामात्र बोकेर हिडे जनताको विश्वास गुमाउनुपर्ने अवस्था आउने बताउनुभएको छ ।

विश्व मुटु दिवसको अवसरमा काठमाडौंको ग्राण्डी अन्तराष्ट्रिय अस्पतालले शनिबार काठमाडौंमा आयोजना गरेको कार्यक्रममा उहाँले सामाजिक परिवर्तनका लागी दलहरुले जनताको नारा पनि बोक्नुपर्ने बताउनुभयो ।

पोखरेलले मुलुक परिवर्तनमा अघि बढिसकेको भन्दै यसको आभाष जनतालाई गराउनुपर्ने धारणा पनि राख्नुभयो । समृद्ध नेपाल र सुखी नेपालीको नारा साकार पार्न राजनीतिक दलहरु गम्भीर हुनुपर्ने बेला आएको उहाको भनाई छ ।

उहाले पार्टीहरुले समाजको मुद्धा उठान नसके उनीहरु अगुवाई गर्न नसक्ने अवस्था आउने जिकिर गर्नुभयो । पोखरेलले समृद्ध नेपाल र सुखी नेपालीको नारा केवल मुलुकलाई धनीमात्र बनाउन कुरा नभई सहज मानवजिवनको बिषय पनि भएको बताउनुभयो ।

कार्यक्रममा ग्राण्डी अस्पतालका अध्यक्ष दिपक कुँवर र कार्यकारी निर्देशक डाक्टर अशोक प्रधानले मुटु रोगबाट बच्नका लागि स्वयं नागरिक नै सचेत हुनुपर्ने धारणा राखेका थिए । मुटु दिवसको अवसरमा ग्राण्डी अन्तराष्ट्रिय अस्पतालले मुटुको निःशुल्क परीक्षणसमेत गरेको थियो ।