काठमाडौं,९ भाद्र । कञ्चनपुर घटनाको दोषीलाई कारवाहीको दायरामा ल्याउन नसकेको भन्दै प्रमुख प्रतिपक्षी नेपाली काग्रेस निकट विद्यार्थी संगठन नेपाल विद्यार्थी संघले प्रधानमन्त्रीको राजीनामा माग गरेको छ ।

कञ्चनपुर घटना भएको लामो समय भईसक्दा पनि वास्तविक दोषीलाई कारवाही गर्न नसकेको भन्दै शनिबार नेविसंघले काठमाडौंको प्रर्दशनीमार्गमा प्रर्दशन गर्दे प्रधानमन्त्रीको राजीनामा माग गरेको हो ।

उनीहरुले महिला हिंसा र बलात्कारको घटनाको दोषीलाई फासीको सजाय दिनुपर्ने माग गरेका छन् भने कञ्चनपुरको प्रर्दशनमा मारिएकालाई सहिद घोषणा गर्नुपर्ने जनाएका छन् । उनीहरुले आफ्ना जनताको जिउधनको रक्षा गर्नुपर्ने भन्दै नारावाजी समेत गरेका थिए ।

प्रर्दशनमा नेविसंघका महामन्त्री कुन्दनराज काफ्लेले कञ्चनपुर घटनाको दोषीलाई कारवाहीको दायरामा नल्याएसम्म आफुहरुको आन्दोलन जारी रहने बताउनुभयो । उहाले सरकार गम्भीर भएर उक्त घटनाको छानविन गर्न माग गर्नुभयो ।

प्रर्दशनकारीले दोषीलाई कारवाहीको माग गर्दे कञ्चनपुरमा गरिएको विरोध प्रर्दशनमा व्यापक प्रहरी हस्तक्षेप भएको भन्दै आपत्ती समेत जनाएका छन् । उनीहरुले जनजिविका र जनसरोकारका बिषयमा गम्भीर हुन सरकारको ध्यानाकर्षण पनि गराएका छन् ।