काठमाडौ, ८ भाद्र । औषधि व्यवस्था विभागले ट्रमाडोल नामक औषधि चिकित्सकको सिफारिसविना विक्री वितरण नगर्न रोक लगाउने भएको छ।

सो औषधि दुखाइ कम गर्न प्रयोग हुन्छ। केही मुलुकमा विक्रीवितरणमा रोक लगाइएको सो औषधिलाई नेपालमा अन्यत्र प्रयोग हुन थालेपछि विभागले यही भदौ १५ गतेदेखि चिकित्सकको सिफारिसविना विक्रीवितरणमा रोक लगाउन लागेको हो। औषधि पसलबाहेक अन्य खुद्रा पसलमा विक्री वितरण गर्न बाँकी रहेका ती औषधि थोक विक्रेतालाई फिर्ता गर्न विभागले आग्रह गरेको छ।

विभागका महानिर्देशक नारायण ढकालले चिकित्सकले सिफारिस गरेका ट्रमाडोलको सङ्ख्या औषधि पसलले भदौ १५ गतेदेखि अभिलेख राखेर मात्र वितरण गर्नुपर्ने व्यवस्था गर्न लागेको जानकारी दिए।

सो औषधि वर्षेनी कति खपत हुन्छ भन्ने कुनै तथ्याङ्क छैन। अब औषधि उत्पादक कम्पनी तथा आयातकर्तालाई पनि के कति मात्रामा सो औषधि उत्पादन एवं आयात गरिएको हो भन्ने यकिन तथ्याङ्क विभागमा बुझाउन भनिएको छ।

यसैबीच विभागले हालसम्म ११७ प्रकारका अत्यावश्यक औषधिको मूल्य निर्धारण गरी कार्यान्वयनमा ल्याएको छ। ती औषधिमा प्यारासिटामोलदेखि अल्मिनाडोलसम्मका छन्। विशेषगरी पछिल्लो समय नसर्ने रोग मुटु, मिर्गौला, रक्तचाप०मा प्रयोग हुने औषधिको मूल्य निर्धारण भएको छ।

नेपालमा पछिल्लो समय सर्नेभन्दा नसर्ने रोगीको सङ्ख्या दिन प्रतिदिन बढिरहेको छ। कार्यविधि बनाइ औषधिको मूल्य निर्धारण गरिएको महानिर्देशक ढकालले जानकारी दिए।