काठमाडौं ७ भाद्र । सरकारले वैदेशिक रोजगारका क्रममा विभिन्न देशमा कोमामा रहेका नेपालीहरुलाई स्वदेश ल्याई उपचार गर्ने भएको छ ।

सिंहदरबारमा बिहीबार बसेको प्रतिनिधीसभा अन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा श्रम रोजगार तथा समाजिक सुरक्षामन्त्री गोकर्ण ले विभिन्न देशमा कोमामा रहेका नेपालीलाई स्वदेशमा ल्याई विभिन्न अस्पतालमा उपचार गर्नका लागी कार्यदल गठन गरेको र कार्यदलको सिफारिस पनि प्राप्त भएको जानकारी दिनुभयो ।

यो संवेदनशील विषय भएको र सरकार यस विषयमा अन्त्यन्त गम्भीर रहेको उहाको भनाई छ । वैदेशिक रोजगारीका क्रममा विभिन्न देश पुगेका २३ नेपाली हाल विदेशी अस्पतालको कोमामा छन् ।

त्यस्तै बिभिन्न देशको जेलमा रहेका नेपालीहरुलाई सहायता प्रदान गर्नका लागी सरकार जिम्मेवार र चिन्तित रहेको भन्दै उहाले कुनै पनि नेपाली नागरिक कानुनी प्रक्रियाको अभावमा निर्दोश हुदा हुदै पनि बिदेशमा जेलमा बस्न नपर्ने बताउनुभयो ।

मन्त्री बिष्टले वैदेशिक रोजगारीमा जादा सिप प्रदान गर्ने संरचना निर्माण गर्ने कार्ययोजना बनिरहेको भन्दै अनिवार्य सिप लिएरमात्र बैदेशिक रोजगारीमा जानुपर्ने व्यवस्था गर्न लागिएको बताउनुभयो ।

उहाले वैदेशिक रोजगार प्रवर्द्धन बोर्डको नाम परिवर्तन गर्दे ‘वैदेशिक रोजगार व्यवस्थापन बोर्ड’ राखिने र बैदेशिक रोजगार क्षेत्रलाई व्यवस्थीत गर्ने जिकिर गर्नुभयो ।

बैठकमा समिति सदस्यहरुले बैदेशिक रोजगारको क्षेत्रमा देखिएका बिकृति र बिसंगतिका साथै यस क्षेत्रमा देखिका समस्याका बारेमा सरकार गम्भीर हुनुपर्ने सुझाव दिएका थिए । बैदेशिक रोजगारको अनुगमनमा सरकारको ध्यान नगएको उनीहरुको भनाई छ ।

त्यस्तै समिति सदस्यहरुले बैदेशिक रोजगारीमा गएका युवाहरुको मुद्धाको विवरण उपलव्ध गराउन पनि आग्रह गरेका थिए । समितिको अर्को बैठक भाद्र १२ गते बोलाईएको छ । बैठकमा बिभिन्न बिद्ययेकमाथि छलफल हुने बताईएको छ ।