काठमाडौं ,५ भाद्र । त्रिभुवन अन्तर्राष्ट्रिय विमानस्थलमा दिउँसोको हवाइ चाप कम गर्न आन्तरिक टर्मिनल बिहान ५ बजेदेखि नै खुलाइने भएको छ ।

अहिले ६ बजे खुल्दै आएको आन्तरिक टर्मिनल सेप्टेम्बर १ अर्थात भाद्र १६ गतेदेखि बिहान ५ बजे नै खुलाइने विमानस्थलले जनाएको छ ।

अहिले ६ बजे विमानस्थल खुल्दा बिहानको ९र१० बजेसम्म आन्तरिक विमानकै चाप धेरै हुने अवस्था आएको भन्दै अब बिहान ५ बजे नै विमानस्थल खुलाउने तयारी भैरहेको त्रिभुवन विमानस्थलका महाप्रबन्धक राजकुमार क्षेत्रीले पत्रकारलाई जानकारी दिएका छन।

बिहान ५ बजे कार्यालय खुल्ने र ६ बजे केही विमान उडिसक्ने उनले जानकारी दिए । अहिले जहाज र हेलिकप्टर गरी त्रिभुवन विमानस्थलबाट झण्डै ३ सय उडान हुँदै आएको उनले बताए ।

हवाइ चापका कारण कुनै कुनै दिन जहाजले आकासमै फन्को लगाउनुपर्ने बाध्यता रहेको उनको भनाइ छ ।

भैरहवा, विराटनगर, नेपालगञ्ज र धनगढी विमानस्थलमा राति पनि उडान र अवतरण गर्न सकिने भएकाले यस्तो व्यवस्था गरिएको विमानस्थलले जनाएको छ । यस्तै जनकपुर र चन्द्रगढीमा पनि रात्री उडानको लागि काम भैरहेको छ ।

असोज १६ गतेदेखि बुद्ध, यती र श्री एअरलाइन्सले दैनिक २५ वटा फ्लाइट बेलुकी ६ बजेपछि गर्नुपर्ने महाप्रबन्धक क्षेत्रीले जानकारी दिए ।