काठमाडौं, ३१ साउन । भारतका पूर्वप्रधानमन्त्री अटल बिहारी बाजपेयीको ९३ वर्षको उमेरमा निधन भएको छ ।
दिल्लीमा रहेको अखिल भारतीय आयुर्विज्ञान प्रतिष्ठान (एम्स)ले विज्ञप्ति जारी गर्दै बिहीबार सा“झ भारतीय समय अनुसार ५ बजेर ५ मिनेट (नेपाली समय ५ बजेर २०मिनेट) जाँदा पूर्वप्रधानमन्त्री वाजपेयीको उपचारका क्रममा निधन भएको जनाएको छ । ९३ वर्षीय वाजपेयी ९ हप्तादेखि एम्समा भर्ना भएका थिए ।

गतको जुनमा मिर्गौलामा संक्रमण भएपछि बाजेपेयीलाई अस्पताल भर्ना गरिएको थियो ।एम्सले जनाएअनुसार बाजपेयीलाई लाइफ सपोर्ट सिस्टममा राखेर उपचार भैरहेको थियो ।

भारतीय जनता पार्टीका संस्थापकसमेत रहेका वाजपेयी ३ पटक भारतको प्रधानमन्त्री बनेका थिए । वाजपेयी सन् १९९६ मा पहिलो पटक १३ दिनका लागि प्रधानमन्त्री भएका थिए । त्यसपछि सन् १९९८ मा ११ महिनाका लागि दोस्रो पटक प्रधानमन्त्री बनेका वाजपेयी सन् १९९८ मा तेस्रो पटक प्रधानमन्त्री भएका थिए । तेस्रो कार्यकाल भने उनले पूरै ५ वर्ष सम्हालेका थिए ।

भारतको सर्वोच्च नागरिक सम्मान भारत रत्नबाट समेत बाजपेयीलाई सम्मानित गरिएको छ । अटल बिहारी बाजपेयी नौ पटक लोकसभामा निर्वाचित भएका छन् । भारतीय प्रधानमन्त्री नरेन्द्र मोदीले अटल बिहारी वाजपेयीको निधनले आफू निःशब्द भएको बताएका छन् ।

वाजपेयीले लोकसभामा दिने गरेका मन्तव्यले के विपक्ष के सत्तापक्ष पूरै मन्त्रमुग्ध हुने गथ्र्यो । वाजपेयीको वाककलाको प्रशंसा गर्दै पूर्व लोकसभा अध्यक्ष अनन्तराम अयंगरले एकपटक भनेका थिए कि ‘लोकसभामा अंग्रेजीमा हिरेन मुखर्जी तथा हिन्दीमा अटल बिहारी वाजपेयीजस्तो राम्रो वक्ता कोही पनि थिएन ।’