इलाम,३१ साउन । गएको वर्षको तुलनामा यो वर्ष राम्रो मूल्य पाएपछि इलामका अदुवा उत्पादक किसान उत्साहित भएका छन् । भारत निर्यात सहज भएपछि यो वर्ष अदुवाको मूल्य किलोको २ सयदेखि पाँचसय रुपैयाँसम्ममा विक्री हुन थालेपछि किसान खुशी भएका हुन् ।

गएको वर्ष मुस्किलले प्रतिकेजी १२ रुपैँयामा विक्री गरेको अदुवा अहिले २ सय रुपैयाँभन्दा बढीमा बिक्री भैरहेको फाकफोकथुम गाउँपालिका–१ की कृष्णमाया निरौलाले भन्नुभयो ‘विक्री नभएकै कारण यस वर्ष खेती नै मासेका थियौँ तर अदुवाको भाउले झुक्यायो, अब अर्को वर्ष फेरि खेती सुरु गर्ने सोचमा छौँ ।

भारतले निकासीमा अवरोध गरेपछि उत्पादित अदुवा निर्यात गर्न निकै समस्या थियो । व्यवसायीक किसानको सावाँ समेत नउठेपछि धेरैले यस वर्ष अदुवा खेती नै गरेका छैनन् ।
उत्पादन कम हुनु र भारत निकासीमा सहज हुनुले अदुवाको भाउ राम्रो आएको हुनसक्ने व्यापारी न्यौपानेले बताउछन ।

यस वर्ष साउनको अन्तिम सातासम्ममा डेढ करोड भन्दा बढीको अदुवा इलामबाट निर्यात भएको छ ।
प्रदेश नम्बर १ का १४ जिल्लामध्ये पाँच जिल्लामा धेरै किसान व्यवसायिक अदुवा खेती गरी जिविकोर्पाजन गरिरहेका छन् । जिन्जर प्रोफाइलका अनुसार, इलाममा ३ हजार २ सय ३३, पाँचथरमा ६ सय ६१, धनकुटामा २ सय ४९ , तेह्रथुममा २ सय १२ र झापामा ३ सय ४२ हेक्टर क्षेत्रफलमा अदुवा खेती हुँदै आएको छ ।

केन्द्रको तथ्याङ्क अनुसार अघिल्लो वर्ष ६५ लाख ८२ हजार आठ सय ९७ किलो अदुवा निकासी भएको छ । जसमा इलामबाट ४५ हजार ९ सय ९४, पाँचथरमा ८ हजार ८ सय ३९ , धनकुटामा ४ हजार ९ सय ३३, तेह्रथुममा ३ हजार दुई सय ७७ र झापामा ४ हजार ५ सय ८३ मेट्रिकटन अदुवा उत्पादन भएर निकासी भएको छ ।

मेची भन्सार कार्यालय काकरभिट्टाबाट मात्र २० हजार ५१ मेट्रिक टन अदुवा भारत निकासी भएको कार्यलयका सूचना अधिकारी रमेश खतिवडाले बताउनुभयो ।

कार्यालयका अनुसार, सन् २०१७ मा नेपालबाट १४ करोड ७७ लाख ५८ हजार ५२९ रुपैयाँको अदुवा भारत निकासी भएको छ भने सन् २०१८ मा १५ करोड पाँच लाख ५७ हजार रुपैयाँको निर्यात भएको छ ।