एजेन्सी, ११ साउन । भारतीय प्रधानमन्त्री नरेन्द्र मोदीको सभामा अचानक एउटा टेन्ट लड्दा मोदीको भाषण सुन्न आएका धेरै जना घाइते भएका छन्।

जसमध्ये घटनामा घाइते भएकी रीता मुदीलाई प्रधानमन्त्री मोदीले अस्पतालमै पुगेर उनलाई भेटेका थिए साथै अटोग्राफ पनि दिएका थिए ।

बाँकुराको क्रिस्टियन कलेजमा स्नातक दोस्रो वर्षमा अध्ययनरत रीता कोलकाताबाट २३० किलोमिटर टाढा रानीबंध गाउँकी बासिन्दा हुन् ।

प्रधानमन्त्री मोदीको अटोग्राफ पाएका कारण रीता एकाएक आफ्नो गाउँमा सेलिब्रिटी बनिन् । रीताको चर्चा गाउँमा मात्रै होइन, अन्य राज्यमा पनि फैलियो ।

यहाँसम्म कि उनलाई विवाहको प्रस्तावसमेत आयो । उनी भन्छिन्, ‘ त्यो दिन जब मेरो सामू पीएम मोदीलाई देख्दा म अत्यन्तै खुशी भएकी थिएँ ।’ गएको जुलाई १६ मा रीता आफ्नी आमा र बहिनीसँग प्रधानमन्त्री मोदीको भाषण सुन्न मिदनापुर आएकी थिइन् ।

रीता र उनको परिवार टेन्टमूनि बसेको कारण उनीहरुमाथि टेन्ट खसेपछि रीता घाइते भइन् । तत्काल उपचारका लागि अस्पताल लगियो । सभा सकिएपछि प्रधानमन्त्री मोदी घाइतेहरुलाई भेट्न अस्पताल पुगे ।

रीता भन्छिन्, ‘मैले प्रधानमन्त्रीसँग अटोग्राफका लागि अनुरोध गरेकी थिएँ । उहाँ अलि हिच्किचाउनु भएको थियो । मैले पुनः आग्रह गरेँ । त्यसपछि एउटा कागजको टुक्रामा प्रधानमन्त्री मोदीले लेख्नुभयो – रीता मुदी तिमी खुशी रहनु, नरेन्द्र मोदी ।’

घटना घटेको अर्को दिन रिताको घरमा त मान्छेकै भिड लाग्यो । सबै जना प्रधानमन्त्रीको अटोग्राफ हेर्न चाहन्थे ।’ रीताकी आमा सन्ध्या भन्छिन्, ‘मान्छेहरु हाम्रो घरमा अटोग्राफ हेर्न मात्रै होइन, विवाहकै प्रस्तावसमेत लिएर आए।

एकजना त टाटानगर, झारखण्डका रहेछन् । केटाको व्यापार व्यवसाय रहेछ । उनले छोरी बाहेक केही मागेका छैनन । दोस्रो प्रस्ताव बांकुराबाटै आएको छ । केटाको खेतीकिसानी गर्ने प्रशस्त जमिन रहेको छ ।