काठमाडौं , २१ असार । ऊर्जा, जलस्रोत तथा सिँचाइको क्षेत्रमा संघीय सरकार र प्रदेश सरकारकोबीचमा आपसी समन्वय हुनुपर्नेमा विभिन्न प्रदेशका भौतिक योजना तथा व्यवस्था मन्त्रीले जोड दिनुभएको छ ।

समन्वयको अभावमा प्रदेशमा विकास निर्माणका काम अगाडि बढ्न नसकेको, विगतदेखि नै निर्माणमा रहेका र निर्माण हुने क्रममा रहेका आयोजनाको प्रगतिसमेत प्रभावकारी नभएको भन्दै उहाँहरुले समस्याको पहिचान र आवश्यक सहजीकरणका लागि आग्रह गर्नुभएको हो ।

ऊर्जा, जलस्रोत तथा सिँचाइ मन्त्रालयमा आज आयोजित अन्तक्र्रियामा प्रदेशका भौतिक पूर्वाधारमन्त्रीले दोहोरोपना नहुने गरी ऊर्जा, जलस्रोत, सिँचाइ, वैकल्पिक ऊर्जा, जलउत्पन्न प्रकोप नियन्त्रण, मौसम पूर्वानुमानलगायतका विषयमा काम गर्नुपर्ने सुझाव दिनुभयो ।

उहाँहरुले प्रदेशका मन्त्रालयमा कर्मचारीको अभाव रहेको, उपलब्ध कर्मचारीसमेत कतिपय अवस्थामा दक्ष नभएको, योजना कार्यान्वयनमा समस्या भएको भन्दै तत्काल सुधारका लागि ऊर्जा, जलस्रोत तथा सिँचाइमन्त्री वर्षमान पुनको ध्यानाकर्षण गराउनुभएको थियो ।

विषयगत कर्मचारी व्यवस्थापनको विषय असाध्यै महत्वपूर्ण भए पनि हालसम्म नभएकाले योजना कार्यान्वयनमा समस्या आएको प्रदेश नं २ का भौतिक पूर्वाधार भौतिक योजना तथा व्यवस्था मन्त्री जीतेन्द्र सोनालको भनाइ थियो ।