काठमाडौं, २ असार। अमेरिकी राष्ट्रपति डोनाल्ड ट्रम्पले चीनबाट आयात हुने ५० अर्ब डलर बराबरको ८०० भन्दा बढी उत्पादनमा २५ प्रतिशत कर लगाउने घोषणा गरेका छन् ।

ह्वाइटहाउसका अनुसार बाँकी १६ अर्ब डलरको उत्पादनमा पनि कर लगाउनेबारे परामर्श गरिने छ । यो कर ६ जुलाईदेखि लागू हुने छ । जुन ८०० भन्दा बढी उत्पादनमा कर लगाइएको छ तिनमा चीनसँग अमेरिकाको वर्षेनी ३४ अर्ब डलरको व्यापार हुन्छ । यदि चीनले पनि यस्तै खालको प्रतियुत्तर दियो भने अमेरिकाले थप कर लगाउने चेतावनी राष्ट्रपति ट्रम्पले दिएका छन् ।

अमेरिकाले चिनियाँ उत्पादनमा जति कर लगाएको छ, त्यहि हिसाबले अमेरिकी उत्पादनमा कर लगाउने चीनले जनाएको छ । चीनले अमेरिका र चीनबीच सबै व्यापार वार्ता बन्द हुने चेतावनी पनि दिएको छ ।
चीन र अमेरिकाबीच ट्रेड वारको आशंकाले यूरोप र अमेरिकाको शेयर बजारमा गिरावट आएको छ । ट्रेड वारलाई व्यापार युद्ध भन्न सकिन्छ । कुनै दोस्रो युद्धको जस्तै यसमा पनि एक देशले अर्को देशमा हमला गर्दछ र प्रतियुत्तरको लागि तयार हुन्छ ।

तर, यसमा हतियारको सट्टा ट्याक्स वा ड्युटीको प्रयोग गरेर विदेशी सामानलाई निशाना बनाइन्छ । जब एक देशले अर्को देशबाट आउने सामानमा कर बढाउँछ भने अर्को देशले पनि यस्तै गर्दछ र यसबाट दुई देशबीच टकराव आउँछ ।
यसबाट दुवै देशको अर्थव्यवस्था प्रभावित हुन्छ र दुवै देशमा राजनीतिक तनाव पनि बढ्छ ।