काठमाडौँ, २५ जेठ । रक्सौलबाट वीरगञ्ज हुँदै काठमाडौं रेलमार्गको प्रारम्भिक सम्भाब्यता अध्ययन सुरु भएको छ ।
यसका लागि भारतीय रेल्वेका कन्सल्टेन्टहरु शुक्रबार नेपाल आएका छन् । पहिलो चरणमा चोभारमा उनीहरुले रेल्वे स्टेशन रहने स्थान अवलोकन गरेका छन् ।
यो टोली वीरगञ्ज पुगेर सम्भाब्यता अध्ययन अघि बढाउने रेल्वे विभागले जानकारी दिएको छ ।

सबै खर्च भारतीय पक्षले बेहोर्ने भएपछि रेलमार्ग अध्ययनका लागि विभागले अन्तिम चरणमा पु¥याएको कम्पनी छनोट प्रक्रिया पनि स्थगित गरिएको छ । यो रेलमार्ग करिब १ सय १३ किलोमिटर लामो हुने अनुमान छ । केरुङ हुँदै काठमाडौं आउने रेलमार्गसाग जोड्ने गरी यो रेलमार्ग बनाउन लागिएको हो । यो रेलमार्ग बनाउँदा करिब २० प्रतिशत सुरुङ र पुलमा निर्माण गर्नुपर्ने अध्ययनले देखाएको छ ।

रक्सौलबाट वीरगञ्ज, निजगढ र बागमती किनार हुँदै काठमाडौंसम्म आइपुग्ने रेलमार्ग केरुङ हुँदै काठमाडौंसम्म आउने रेलमार्ग भन्दा केही सहज तरिकाले निर्माण गर्न सकिने रेल्वे विभागमा बरिष्ठ इन्जिनियर प्रकाशभक्त उपाध्यायले बताए । प्रराम्भिक सम्भाब्यता अध्ययनको रिपोर्ट अबको ३ महिनापछि मात्रै आउनेछ । यसको डीपीआर निर्माणका लागि भने करिब थप १५ महिना खर्चिनुपर्छ ।

रक्सौलदेखि वीरगञ्जसम्म खण्डमा भने यसअघि नै रेलमार्ग बनिसकेको छ । यही रेलमार्गलाई नै अपग्रेड गरेर यात्रु ओसार पसारका लागि प्रयोग गर्ने विभागको योजना छ । नेपाल–भारत दुई देशका प्रधानमन्त्रीका बीचमा एक वर्षभित्रै यसको सर्वे गरिसक्ने सहमति भएको छ । साथै यसको निर्माणका लागि डीपीआर र फन्डिङ मोडालिटी तयार गर्ने पनि सहमति भएको छ ।