सप्तरी, २४ जेठ ।  राजविराज विमानस्थलबाट उडान गर्न अनुमति पाएको श्री एयरलाइन्सले असार १ गतेबाट आफ्नो सेवा दिन सम्पूर्ण तयारी गरिसकेको जनाएको छ ।

श्री एयरलाइन्सका बजार व्यवस्थापक सुजन विष्टले आगामी असार १ गतेबाट काठमाडौं–राजविराज नियमित जहाज उड्ने सम्पूर्ण आन्तरिक तयारी भइसकेको जानकारी दिएका छन् ।

एयरलाइन्सका तर्फबाट राजविराज विमानस्थल र बजार व्यवस्थापनका लागि राजविराज आइपुगेका बजार व्यवस्थापक विष्टले सो कुराको जानकारी दिएका हुन् । उनका अनुसार पूर्वनिर्धारित कार्यक्रम अनुसार एयरलाइन्सले सप्तरीवासीसँग गरेको प्रतिबद्धता पुरा गर्न हरसम्भव प्रयासरत रहेको छ ।

नागरिक उड्ययन प्राधिकरणले टर्मिनल भवनमा रहेको यात्रु प्रतिक्षालय, भिआइपी कोठा लगायतको मर्मत सम्भार गर्ने कार्य सुस्त गतिमा गरिरहेको प्रति बजार व्यवस्थापक विष्टले चिन्ता व्यक्त गरेका छन् ।
“विमान संचालन गर्ने समय नजिकै जाँदा हालसम्म भौतिक संरचनाको मर्मत गर्ने काम सुस्त गतिमा भइरहेकोले असार १ गते उडान हुने नहुने कुरामा शंका उब्जिएको छ ।” उनले भने, “विमानस्थल संचालनको महत्वपूर्ण पाटो टर्मिनल भवन नै रहेकोले टाबर जडान, यात्रु प्रतिक्षालय, चेकिङ रुम, टिकट रुजु गर्ने कक्ष लगायतको काम पहिले नै हुनुपर्ने हो ।”

यस्तै विमान ल्याण्ड गर्ने स्थल नजिकै रनवे कालोपत्रे गर्न प्रयोग गरिएको निर्माण सामाग्रि तथा उपकरणहरु हालसम्म पनि त्यही रहेकोले विमान ल्याण्ड गर्न अफ्ठ्यारो हुने जिकिर गर्दै त्यस्ता उपकरणलाई सक्दो चाडै सो स्थानबाट अन्यत्र व्यवस्थापन गर्न सुझाव समेत दिए । यात्रुहरुलाई विमानसम्म पुग्न एकमात्र बाटो टर्मिनल भवनहुँदै रहेकोले टर्मिनल भवन वरिपरि रहेको क्षेत्रलाई घेरबार गर्न समेत सम्बन्धीत निकायलाई उनले आग्रह गरे ।

त्यस्तै विमानस्थलमा पार्किङको व्यवस्था तथा यात्रुहरुको आफन्तहरुलाई बस्ने कक्ष समेत नरहेकोले त्यसतर्फ ध्यान पु¥याउन विमानस्थल व्यवस्थापनलाई आग्रह गरिएको छ । विमानस्थलसम्म पुग्न लिंक रोडबाट झण्डै एक किलोमिटरको सडक समेत जिर्ण रहेकोले सो सडकलाई चाडै कालोपत्रे गर्न सकिए यात्रुहरुलाई आवतजावत गर्न सजिलो हुने उनको तर्क छ ।
एयरलाइन्सका बजार व्यवस्थापकद्वयले सप्तरीवासीको दशकौदेखी विमान चढ्ने सपनालाई मध्यनजर गर्दै विमानको न्युनतम भाडादर ३ हजार ५ सय राखिएको समेत जानकारी दिए ।

यसअघि जेठ ९ गते लामो समयको प्रतिक्षापछि संस्कृतिक पर्यटन तथा नागरिक उडड्यन मन्त्री रबिन्द्रनाथ अधिकारीले श्री एयरलाइन्सको ९ एएएमए जहाजबाट नवनिर्मित काठमाडौं–राजविराज विमानस्थलको रनवे उद्घाटन गरेका थिए । यसको एक दिनअघि श्री एयरलाइन्सको सोही जहाजले रनवेमा सफल उडान परिक्षण गरेको थियो ।
उद्घाटन पश्चात् आयोजित कार्यक्रममा कार्यक्रममा श्री एयरलाइन्सका प्रमुख सुधिर मित्तललाई मन्त्री अधिकारीले असार १ गते भित्रै नियमित उडान सेवा संचालन गर्न निर्देशन दिएका थिए ।