काठमाडौं, २१ जेठ । भारतीय प्रहरीले ट्याङ्कर चालकलाई कुटपिट गरेपछि नेपाली व्यवसायीले इन्धन ढुवानी रोकेका छन् । वीरगञ्जबाट इन्धन ढुवानी गर्ने ट्याङ्कर चालकहरूले आफुमाथि भारतिय प्रहरीले कुटपीट गरेकाले सुरक्षाको माग गर्दै आज आइतबारदेखि इन्धन ढुवानी रोकेका हुन् ।

नेपाल पेट्रोलियम ढुवानी व्यवसायी महासंघका उपाध्यक्ष सुरेन्द्र श्रीवास्तवका अनुसार शनिबार भारतीय प्रहरीले ७ जना नेपाली ट्याङ्कर चालकमाथि कुटपिट गरेका थिए । कुटपिटबाट ती चालक घाइते भएको उनले बताए । भारतीय प्रहरीले वीरगञ्ज सुक्खा बन्दरगामा नेपाली चालकमाथि हमला गरेका श्रीवास्तवले बताए ।
भारतीय पुलिसले कुटेको उक्त घटनापछि आइतबार वीरगञ्ज नाकाबाट इन्धन ढुवानी नै रोकिएको छ भने नेपाल आयल निगमको थानकोट र अमलेखगञ्ज डिपोमा इन्धन लोड/अनलोड पनि ठप्प छ ।

इन्धन ढुवानी रोकिएपछि महासंघले सुरक्षाको प्रत्याभूतिको माग गर्दै उद्योग, वाणिज्य तथा आपूर्ति मन्त्रालय र निगमलाई पहल गरिदिन आग्रह गरेको छ ।