रोल्पा, ३ जेठ । रोल्पामा सञ्चालित प्रथम सभामुख कप भलिबल प्रतियोगिता बुधबार सम्पन्न भएको छ ।
प्रतियोगितामा पुरुषतर्फ नेपाल पुलिस क्लब प्रथम भएको छ भने महिलातर्फ सशस्त्र प्रहरीको एपीएफ क्लबले जित हासिल गरेको छ । बुधबार बिहान सम्पन्न फाइनल खेलमा त्रिभुवन आर्मी क्लब र नेपाल पुलिस क्लबबीच भएको प्रतिस्पर्धामा नेपाल पुलिस क्लब विजयी भएको हो ।
नेपाल आर्मी क्लबको एक सेटका विरुद्ध नेपाल पुलिस क्लब तीन सेट जितेर विजयी भएको हो । तेस्रो स्थानका लागि मंगलबार भएको एपीएफ क्लब र ४ नम्बर प्रदेशबीचको प्रतिस्पर्धामा ४ नम्बर प्रदेश विजयी भएको थियो ।
योसँगै रोल्पामा सम्पन्न प्रथम सभामुख क्लब भलिबलमा नेपाल पुलिस क्लब प्रथम, त्रिभुवन आर्मी क्लब द्धितीय र ४ नम्बर प्रदेशले तृतीय स्थान हासिल गरेका छन् ।
यसैगरी, महिलातर्फ एपीएफ क्लब र नेपाल पुलिस क्लबबीच भएको फाइनल खेलमा एपीएफ क्लब विजयी भएको छ । तेस्रो स्थानका लागि त्रिभुवन आर्मी क्लब र ५ नम्बर प्रदेशबीच भएको प्रतिस्पर्धामा नेपाल आर्मी क्लब विजयी भएको थियो । महिलातर्फ एपीएफ क्लब प्रथम, नेपाल पुलिस क्लब द्धितीय र त्रिभुवन आर्मी क्लब तृतीय भएका छन् ।
प्रतियोगितामा प्रथम, द्धितीय र तृतीय हुने टिमलाई क्रमशः नगद रु तीन लाख, दुई लाख र एक लाख, ट्रफी र प्रमाणपत्र प्रदान गरिएको थियो । प्रतियोगिता सभामुख कृष्णबहादुर महराले गत वैशाख २९ गते उद्घाटन गर्नुभएको थियो ।
–––
प्रतिक्रिया दिनुहोस्