काठमाडौं, २७ वैशाख । सुन्दर, सामान्य र शालीन छिन् करिश्मा मानन्धर । नेपाली फिल्म क्षेत्रमा तीन दशक बिताइसकेकी छिन् करिश्माले । पछिल्लो समय उनी राजनीतिमा पनि सक्रिय छिन् ।

नयाँ शक्ति पार्टी र यसका संयोजक डा. बाबुराम भट्टराईका नीतिबाट प्रभावित भएपछि समाजमा केही योगदान गर्ने सोचका साथ राजनीतिमा लागेको उनी बताउँछिन् ।

७ कक्षामा अध्ययन गर्दै गर्दा करिश्मा फिल्मी दुनीयामा प्रवेश गरिन् । त्यसपछि उनको विद्यालय तहको पढाईमा ब्रेक लाग्यो । तर, अहिले आएर उनले फेरी आफ्नो पढाइलाई निरन्तरता दिएकी छन् । ७ कक्षाको परीक्षा पुनः दिएर करिश्माले अध्ययनलाई निरन्तरता दिएकी हुन् ।

उनले ग्यालेक्सी पब्लिक स्कुलबाट ८ कक्षा पास गरिन् । त्यसपछि उनी मैतीदेवीको त्रिवेणी पब्लिक स्कुलमा ९ कक्षामा भर्ना भइन् । करिश्माले अब आउने एसईई परीक्षा दिनेछिन् ।

करिश्माको सेड्युल

पढाइले गर्दा करिश्मा अहिले निकै व्यस्त छिन् । बिहान ९ बजेदेखि ३ः१५ सम्म नियमित स्कुल जान्छिन् । क्लास सकिएलगत्तै ५ः १५ सम्म कोचिङ कक्षा पनि छ ।

६ बजेदेखि ७ बजेसम्म उनी घरमै व्यायाम गर्छिन् । त्यसपछि केही समय घरपरिवारसँग बिताउँछिन् । सासू र छोरीसँग कुराकानी गर्छिन् । डिनर गरेपछि ८ बजेदेखि १० बजेको समयमा स्कूलको होमवर्क गर्छिन् । अनि, सुत्छिन् ।

सफल करियर र लोकप्रियताको उचाईमा पुगीसकेपछि पनि उनले पढाईप्रति देखाएको लगावलाई सरहानिय मान्नैपर्छ ।