काठमाडौं, १६ वैशाख । दुई देश स्वतन्त्र भएपछि भारत र पाकिस्तानले पहिलो पटक संयुक्त सैन्य अभ्यास गर्ने भएका छन् ।
आउँदो सेप्टेम्बरमा रसियामा हुने अन्तरदेशीय प्रतिआतंकवाद अभ्यासमा भारत र पाकिस्तानले संयुक्त सैन्य अभ्यास गर्न लागेका हुन् ।
भारतीय रक्षा मन्त्री निर्मला सिथारमनले भारतीय समाचार संस्था पीटीआईसँग यो कुराको पुष्टि गरेकी छन् ।
सांघाइ कोपरेसन अर्गनाइजेसन (ओएससीओ) ले आयोजना गरेको उक्त संयुक्त सैन्य अभ्यासमा चीनसहित एससीओका सदस्य राष्ट्र सहभागी हुनेछन् । सांघाइ कोअपरेसन अर्गनाइजेसन (एससीओ) का सदस्य राष्ट्रको आतंकवाद विरुद्धको सहकार्य अभिवृद्धि गर्नको लागि सो कार्यक्रमको आयोजना हुन लागेको हो ।
भारत र पाकिस्तानका सैनिकहरुले संयुक्त राष्ट्रसंघीय शान्ति स्थापना मिसनमा सँगै काम गरे पनि यी दुई राष्ट्रहरु स्वतन्त्र भएपछि संयुक्त सैन्य अभ्यास हुन लागेको यो पहिलो पटक हो ।
यो सैन्य अभ्यास रसियाको युराल पर्वतमा हुने सम्भावना छ । सांघाइ कोअपरेसन अर्गनाइजेसनको स्थापना सन् २००१ मा भएको हो । र, हाल यसको अध्यक्षता रसियाले गरेको छ ।
उक्त कार्यक्रममा भारत र चीनबीच रोकिएको द्विपक्षीय सैन्य अभ्यास पनि नियमित हुने अनुमान गरिएको छ । जुन गत वर्ष डोकलाम घटनापछि रोकिएको थियो ।
प्रतिक्रिया दिनुहोस्