काठमाडौं, ११ वैशाख । राष्ट्रिय पुनर्निर्माण प्राधिकरणले करिव साढे दुईबर्षभित्र पुनःनिर्माणका सबै कार्य पूरा हुने जनाएको छ ।
गोरखा भूकम्पको तेश्रो स्मृति दिवसको अबसरमा मंगलबार काठमाडौमा पत्रकार सम्मेलन गर्दे प्राधिकरणका प्रमुख कार्यकारी अधिकृत युवराज भुसालले प्राधिकारणको स्थापनाको पाँच वर्षभित्र पुनर्निर्माणका सबै कार्य पूरा हुने दाबी गर्नुभएको हो । आगामी असारमा प्राधिकरण स्थापना भएको साढे दुईबर्ष पुग्दैछ ।
पुनःनिर्माण कार्यमा खासै चुनौती नभएको अधिकृत भुसालको दाबी छ । तर, पनि भौतिक रुपमा जोखिममा रहेका वर्गका लागि २४ हजार घर निर्माण गर्नुपर्ने छ । पाँच हजार ५ सय घर निर्माणाधीन अवस्थामा रहेको उहाले बताउनुभयो । स्थानीय तह गठन भएपछि पुनःनिर्माणको कार्य गर्न सजिलो भएको बताउँदै प्रमुख कार्यकारी अधिकृत भुुसालले स्थानीय गाउँपालिका प्रतिनिधिहरु खास गरेर गाउँपालिका महासंघसँग अन्तरक्रिया गरेर काम अगाडि बढाइएको जानकारी दिनुभयो ।
प्राधिकरणका प्रमुख कार्यकारी अधिकृत भुसालले पुनःनिर्माणमा सघाइरहेका दातृ निकायलाई धन्यवाद दिँदै सम्बन्धित सबै निकायलाई प्राधिकरणसँग समन्वय गरेर पुनःनिर्माणमा लाग्न आग्रह गर्नुभयो ।
भूकम्पपछिको पुनःनिर्माणका लागि कूल रकम रु सात खर्ब छ अर्ब आवश्यक पर्ने भनिए पनि हालसम्म करीब एक खर्ब २० अर्ब मात्र खर्च भएको छ ।
भूकम्पबाट क्षतिग्रस्त सात लाख ६७ हजार ७ सय ५ निजी घर लाभग्राहीको सेवा सूचीमा रहेको र त्यसमध्ये हालसम्म एक लाख १९ हजार २३३ घर निर्माण सम्पन्न भइसकेको पुननिर्माण प्राधिकरणका सचिव अर्जुनकुमार कार्कीले बताउनुभयो । कार्कीले धरहरा पुननिर्माणको कार्य सुरु भईसकेको जानकारी दिदै अन्य सम्पदा निर्माणमा देखिएका समस्या पनि समाधान गर्न प्राधिकरण तयार रहेको बताउनुभयो । उहाले प्राधिकरणलाई आवश्यक पर्ने बजेट निकासका लागी पनि समस्या देखा परेको गुनासो गर्नुभयो ।
पुनर्निर्माणका क्रममा हालसम्म तीन लाख ६८ हजार ७ सय ६१ लाभग्राहीले दोस्रो किस्ता लिइसकेको र एक लाख २३ हजार ५३७ लाभग्राही तेस्रो किस्ताको रकम लिने प्रक्रियामा रहेको बताइन्छ । भूकम्पपछिको आवश्यकता आकलन प्रतिवेदन अनुसार भूकम्पबाट चार लाख ९८ हजार ८५२, निजी घर र दुई हजार ६५६ सरकारी भवन पूर्ण रुपमा क्षति भएका थिए । त्यस्तै, दुई लाख ५६ हजार ६९७ निजी घर र तीन हजार ६२२ सरकारी भवन आंशिक रुपमा क्षति भएका थिए ।
प्रतिक्रिया दिनुहोस्