एजेन्सी, ११ वैशाख । भारतीय प्रधानमन्त्री नरेन्द्र मोदीको हत्याको षड्यन्त्र रचेको आरोपमा भारतीय तामिलनाडु प्रहरीले मंगलबार मोहम्द रफीकलाई पक्राउ गरेको छ ।

उनलाई गिरफ्तारपछि १५ दिनको न्यायिक हिरासतमा राखिएको छ ।

अभियुक्त रफीक सन् १९९८ मा कोयम्बटूरमा गराइएको बम विस्फोटमा दोषी ठहरिएका थिए । तामिलनाडुको कोयम्बटूरमा भएको सो बम विस्फोटमा ५८ जनाको ज्यान गएको थियो । उनले सो मुद्धामा पाएको सजाय पूरा गरिसकेका छन् ।

भारतीय समाचार संस्था एएनआईका अनुसार आरोपी मोहम्मद रफीकको टेलिफोन रेकर्डिङ प्रहरीले फेला पारेको थियो । जसमा रफीकले प्रकाश नाम गरेका व्यापारीसँग भारतीय प्रधानमन्त्री नरेन्द्र मोदीको हत्याको योजना बनाएको कुरा भएको प्रहरीले बताएको छ ।

रफीकले प्रकाशसँग गरेको कुराकानी सामाजिक सञ्जालमा पनि बाहिरिएको छ । रफीकले आफ्नो योजना सुनाउँदै प्रकाशसँग भनेका छन्, ‘मैले प्रधानमन्त्री नरेन्द्र मोदीको हत्या गर्ने निर्णय लिएको छु । मैले नै कोयम्बटूर भ्रमणमा रहेका बेला बीजेपी नेता लालकृष्ण आडवाणीलाई लक्षित गरेर बम विस्फोट गराएको थिएँ ।’