काठमाडौं, ६ वैशाख । प्रहरीले एपेक्स डेभलपमेन्ट बैंकको साढे एक अर्ब रुपैयाँ घोटालामाथि छानबिन सुरु गरेसंगै घटनामा संलग्न केही मुख्य व्यक्तिहरु विदेश भागेका छन्। विदेश जानेमा केहि पूर्व सिइओ तथा सञ्चालकहरु रहेका छन् ।
घोटालामा संलग्न बैंकका तत्कालीन सिइओ गोविन्दप्रसाद उपाध्याय अमेरिका पुगेका छन् भने उनीसहित अन्य तीन सञ्चालक छानबिन सुरु भएलगत्तै विदेश पसेका छन् ।
प्रहरीको केन्द्रीय अनुसन्धान ब्यूरो (सिआइबी)का अनुसार, तत्कालीन सञ्चालकहरु वसन्त मल्ल, लोकेन्द्र कर्माचार्य र रिता वादे श्रेष्ठ देश बाहिर छन्। घोटालामा संलग्नहरुको खोजी गर्ने क्रममा उनीहरु विदेश गएको खुलेको हो।
पूर्व सिइओ उपाध्याय र तीन सञ्चालक विरुद्ध प्रहरीले इन्टरपोलमार्फत नोटिस जारी गराई पक्राउ गराउने प्रक्रिया अघि बढाएको छ।
एपेक्स बैकंका कर्मचारीहरु मिलेर कमसल धितोमा कर्जा प्रवाह गरी करिब डेढ अर्ब रुपैयाँ घोटाला भएको तथ्य बाहिर आएको थियो ।
मोटरबाटो नभएको, भिरालो जग्गाको अधिक मूल्यांकन गरेर बैंकका सञ्चालक तथा कर्मचारीहरुले कर्जा प्रवाह गरेका थिए। जुन कर्जा उठ्न नसककेपछि बैंक नै समस्यामा परेको थियो र घटना सतहमा आएको थियो । राष्ट्र बैंकको अनुसन्धानबाट एपेक्स बैंकबाट एक अर्ब ५० करोड ९६ लाख ३३ हजार ९ सय ८४ रुपैयाँ अनियमितता भएको खुलेको थियो।
घोटालामा संलग्न तत्कालीन सञ्चालक, कर्मचारी, ऋणी तथा भ्यालुएटरसहित २० जनालाई सिआइबीले पक्राउ गरिसकेको छ।
सिआइबीले गत चैत २ गते एकैदिन १३ जनालाई पक्राउ गरेको थियो। बैंकका तत्कालीन अध्यक्ष विष्णुप्रसाद धिताल तथा सञ्चालकहरु इच्छाबहादुर गुरुङ, सुवर्णराज भण्डारी, छविरमण अधिकारी, मधुवनलाल श्रेष्ठ पक्राउ परिसकेका छन्।
त्यस्तै, तत्कालीन निमित्त सिइओ ऋषिराज भट्ट, वरिष्ठ प्रबन्धक दुर्गादत्त जोशी, सहायक महाप्रबन्धक रामचन्द्र बसौला, शाखा प्रबन्धक विकास श्रेष्ठ, सागर नेउपाने, मानबहादुर राउत, सुदीप थापा, सहायक महाप्रबन्धक विनीतमणि उपाध्याय, कर्जा अधिकृत मोहन खरेल पक्राउ परिसकेका छन्।
कर्जाको मूल्यांकनकर्ता इञ्जिनियर नरेश स्वाँर तथा कर्जा लिने ठेकेदार मनोज भेटवाल पनि पक्राउ परिसकेका छन्।
उनीहरुमाथि बैंकिङ कसुर मुद्दामा अनुसन्धान भइरहेको सिआइबीले जनाएको छ।
प्रतिक्रिया दिनुहोस्