काठमाडौं । नेकपा (एमाले) भित्रको नेतृत्व र रणनीतिमा सुधार आवश्यक रहेको भन्दै बाम बुद्धिजीवी तथा नेकपा (एमाले) का नेता निर्मल भट्टराई ले एबीसी टेलिभिजनको “वाच” कार्यक्रममा स्पष्ट टिप्पणी गर्नुभएको छ।

कविराज विसीसँगको अन्तरवार्तामा भट्टराईले वर्तमान एमाले नेतृत्वमा देखिएको आत्मकेन्द्रित निर्णयशैली र व्यक्तिगत घमण्डले पार्टी एकता कमजोर बनाएको उल्लेख गर्नुभयो। उहाँका अनुसार, नीति र रणनीति सुधार नगरी कम्युनिस्ट आन्दोलनलाई पुनः मजबुत बनाउन सकिँदैन।

‘नेतृत्वले आफूलाई मात्र सर्वश्रेष्ठ ठान्ने प्रवृत्ति देखियो, जसले पार्टी भित्रको लोकतान्त्रिक निर्णय प्रक्रियालाई प्रभावित बनायो र कम्युनिस्ट आन्दोलन कमजोर बनायो,’ उहाँले भन्नुभयो।

भट्टराईले पार्टी एकताको नाममा पद जोगाउने वा स्वार्थ पूर्तिका लागि निर्णय गर्ने प्रवृत्ति पनि फेर्नुपर्ने बताए। उहाँका अनुसार, जनताको अपेक्षा अनुसार काम गर्ने, रणनीति परिवर्तन गर्ने र नयाँ नेतृत्वलाई अवसर दिनेबिना एमाले र समग्र कम्युनिस्ट आन्दोलनलाई अघि बढाउन सकिँदैन।

उहाँले दक्षिण एसियाली कम्युनिस्ट आन्दोलनको पछिल्लो अवस्थासमेत उदाहरण दिँदै, नेपालमा मात्रै नभई अन्य मुलुकमा पनि नेताहरूको व्यक्तिगत घमण्ड र आन्तरिक कमजोरीका कारण आन्दोलन कमजोर भएको टिप्पणी गर्नुभयो।

भट्टराईले स्पष्ट पार्नुभयो कि नेतृत्व परिवर्तन, नीति सुधार र संगठनात्मक पुनर्संरचना नै अहिलेको प्रमुख आवश्यकता हो। उहाँको धारणा अनुसार, यी सुधार भएमा मात्र एमाले र नेपालका कम्युनिस्ट आन्दोलनले जनताको अपेक्षा अनुसार पुनः मजबुत रूपमा अघि बढ्न सक्छ।