काठमाडौं, ४ वैशाख । प्रधानमन्त्री बालेन्द्र शाह ले मन्त्रीहरूसँगको संवादलाई गोप्य र सुरक्षित बनाउन नयाँ अभ्यास सुरु गरेका छन्। स्रोतका अनुसार प्रधानमन्त्री कार्यालयमार्फत मन्त्रीहरूलाई छुट्टै मोबाइल सेट र सिमकार्ड उपलब्ध गराइएको छ, जुन केवल प्रधानमन्त्रीसँगको प्रत्यक्ष सम्पर्कका लागि मात्र प्रयोग हुने व्यवस्था गरिएको छ।

उक्त गोप्य नम्बर र सेटबारे मन्त्रीहरूले सार्वजनिक रूपमा जानकारी दिन नपाउने व्यवस्था गरिएको बताइन्छ। परिवार, आफन्त वा सार्वजनिक प्रयोगमा रहेका नम्बरभन्दा फरक यो प्रणालीले संवेदनशील संवाद सुरक्षित राख्ने उद्देश्य राखिएको प्रधानमन्त्री निकट स्रोतको दाबी छ।

प्रधानमन्त्री शाहले सार्वजनिक नम्बरमा सम्पर्क नगर्ने र गोप्य नम्बरमार्फत मात्रै कुराकानी गर्ने अभ्यास अपनाएको बताइन्छ। यसले अनावश्यक रेकर्डिङ, सूचना चुहावट तथा विवादास्पद अडियो सार्वजनिक हुने जोखिम कम गर्ने अपेक्षा गरिएको छ।

विगतमा विभिन्न नेताहरूका अडियो टेप सार्वजनिक भई राजनीतिक विवाद चर्किएको सन्दर्भमा यस्तो व्यवस्था ल्याइएको विश्लेषण गरिएको छ। पूर्व सञ्चारमन्त्री गोकुल बाँस्कोटा र माओवादी नेता कृष्णबहादुर महरा लगायतका घटनाले गोपनीयतामाथि प्रश्न उठाएको थियो।

यद्यपि, नयाँ व्यवस्थाप्रति मन्त्रीहरूमै मिश्रित प्रतिक्रिया देखिएको छ। कतिपय मन्त्रीले यसलाई आवश्यक सुरक्षा उपाय मानेका छन् भने केहीले आफूहरूलाई पूर्ण जानकारी नभएको बताएका छन्। संघीय मामिला तथा सामान्य प्रशासन मन्त्री प्रतिभा रावल ले यस्तो व्यवस्थाबारे हालै मात्र सुनेको प्रतिक्रिया दिएकी छन्।

दूरसञ्चार विज्ञहरूका अनुसार यस्तो अभ्यासले निर्णय प्रक्रियालाई छिटो, सुरक्षित र केन्द्रित बनाउन मद्दत पुर्‍याउन सक्छ। तर पारदर्शिता र जवाफदेहितामा प्रश्न उठ्ने जोखिम पनि उत्तिकै रहेको उनीहरूको भनाइ छ।

पूर्वमुख्यसचिव लीलामणि पौडेल का अनुसार अघिल्ला मन्त्रिपरिषद्हरूमा यस्तो अभ्यास प्रचलनमा थिएन। त्यसैले यसलाई नयाँ शैलीको प्रशासनिक प्रयोगका रूपमा हेरिएको छ।